Papa Leo XIV İspaniyaya səfərinin ilk günündə insanlara "qütbləşmənin alovlarını söndürməyə" çağırıb.

Ölkədə bir həftə qalacaq papa şənbə günü etdiyi çıxışda insanlardan parçalanma ritorikasından istifadə edərək populyarlıq qazanmaq cəhdindən çəkinməyi xahiş edib.

“Hər kəsi cəmiyyətinizin reallığı və tarixi ilə bağlı qütbləşdirici və ayrı-seçkilik yaradan fikirləri bir kənara qoymağa çağırıram. Mürəkkəbliyi məhsuldar şəkildə qiymətləndirək və boş sadələşdirmələri dəf edək,” deyib.

Katolik Kilsəsinin rəhbəri olan ilk amerikalı papa texnologiyanın parçalanmanın səbəbi olduğunu, onun ön mühakimələri artırdığını və tənqidi düşüncəni zəiflətdiyini vurğulayıb.

Onun sözləri İspaniyanın miqrasiya və siyasi korrupsiya kimi məsələlərdə qalmaqallarla üzləşdiyi vaxtda səslənib.

İspaniyanın görüş tarixindən nümunə

Papa Leo İspaniyanın keçmişini dinlər və mədəniyyətlər arasında sülh içində birgəyaşayış nümunəsi kimi göstərib. Onun sözlərinə görə, ölkənin tarixi “qarşıdurma deyil, görüş mədəniyyətinin sabitlik və tərəqqi üçün əsas olduğunu” sübut edir.

“Reallıqda sülh mesajı, təəssüf ki, bəzilərinə sadəlövhlük, bəzilərinə isə qarşıdurma kimi görünür. Lakin bu mesaj öncədən möhkəmlənmiş ideologiyalardan qapanmayan, əksinə həqiqətə açıq olanlar tərəfindən qəbul edilir,” deyib.

Papa Leonun İspaniyaya səfəri geniş maraqla qarşılanıb. Madridin mərkəzi küçələri, metro vagonları və müxtəlif yerlər onun şəkilləri ilə bəzədilib. İzdiham toplaşıb.

Səfər Puerto Rikolu məşhur müğənni "Bad Bunny"nin bu həftəsonu keçirəcəyi iki konsertlə eyni vaxta təsadüf edir.

“Əgər insanlara “Bad Bunny-nin konsertinə gedəsən, yoxsa papaya?” sualı verilsə, çoxlarının "Bad Bunny"nin konsertini seçəcəyini düşünürəm,” deyib Papa Leo.

“Amma papa üçün bura gələn bir neçəsi də olacaq. Bu da xəbərdarlıqdır, bilirsiniz.”

Papa Leo dünyada miqrasiya, süni intellekt və ABŞ-İsrailin İranla müharibəsi məsələləri üzrə açıq mövqe bildirib. O, ABŞ Prezidenti Donald Trampla davamlı açıq münaqişə içindədir.