Asiyada bazar ertəsi ticarətin əvvəlində neft qiymətləri Pakistanın ABŞ və İran arasındakı müharibənin bitməsinə vasitəçilik etməsindən sonra azaldı. Prezident Donald Tramp Hormuz boğazı kimi əsas nəqliyyat yolunun yenidən açılacağını elan etdi.

Qlobal neft göstəricisi olan Brent nefti barelə görə 4% ucuzlaşaraq 83,81 dollara, ABŞ-da ticarət olunan neft isə 4,7% azalaraq 80,89 dollara enib.

Pakistanın baş naziri Şahbaz Şərif rəsmi imza mərasiminin 19 iyun cümə günü İsveçrədə keçiriləcəyini açıqlayıb.

İranın Xarici İşlər Nazirliyinin müavini Kazim Qəribabadi dövlət televiziyasında telefonla ABŞ-la razılaşmanın yekunlaşdığını təsdiqləyib. Tramp isə sosial mediada "neftin axmasına icazə verin!" paylaşımını edib.

Enerji bazarları üzrə təhlil firması "Vanda Insights"dan Vandana Hari razılaşmanın detalları bilinmədiyindən bazarda narahatlıq və qeyri-müəyyənlik yarada biləcəyini söyləyib.

O, bunun neft bazarında bir həftəlik qeyri-müəyyənlik və sabitliksizlik yaradacağını əlavə edib.

Hormuz boğazı ABŞ və İsrailin İran üzərində 28 fevralda həyata keçirdiyi hava zərbələrindən sonra faktiki bağlı qalmışdı.

Tehran əsas su yolunu keçən gəmiləri hədələmişdi. Bu yol vasitəsilə dünyadakı neftin və mayeləşdirilmiş təbii qazın təxminən 20 faizi daşınır.

Qlobal enerji bazarları son vaxtlar ABŞ-İran müharibəsində baş verən hadisələrə görə qiymətlərin kəskin yüksəlib enməsi ilə yadda qalıb.

Münaqişə başlamazdan əvvəl Brent nefti barelə görə təxminən 70 dollar qiymətində idi, müharibə dövründə isə 120 dollara qədər qalxmışdı.

Enerji ekspertləri su yolundan neftin hərəkətinin müharibədən əvvəlki səviyyəyə dərhal qayıtmayacağını xəbərdar ediblər.

"Lipow Oil Associates" konsaltinq şirkətindən Endryu Lipov bildirib ki, əvvəlcə boğazda minaların təmizlənməsi lazımdır ki, bu proses bir neçə həftədən altı aya qədər çəkə bilər.

O əlavə edib ki, bu vaxt ərzində çoxlu tanker boğazdan keçmək üçün gözləyir, neft hasilatının bərpası və gəmilərin yüklənməsinin normal səviyyəyə çatması isə həftələrlə davam edə bilər.

Asiya fond bazarları da bazar ertəsi razılığı investorlar müsbət qarşılayaraq yüksəlib.

Yaponiyanın "Nikkei 225" səhm indeksi səhər ticarətində 4,3%, Cənubi Koreyanın "Kospi" indeksi isə 5%-dən çox artıb.

Bu region Orta Şərqin neft və LNG təchizatına yüksək asılılıq səbəbindən artan enerji qiymətlərindən xüsusilə çox təsirlənmişdi.