Nvidia-nın baş icraçı direktoru Censen Huang GTC Taipei tədbirində yerli vaxtla 20:00-da səhnəyə çıxacaq. Burada bütün yeniliklər elan olunacaq. Təqdimatla bağlı müxtəlif ehtimallar var, lakin əsas gözlənti Microsoft-la əməkdaşlıq və Windows üçün ARM platformasının yenilənməsi ilə bağlıdır. Microsoft Surface seriyası üçün “PC-nin yeni dövrü”nü anons edib. Yeni Nvidia ARM prosessorları — N1 və N1X — həmin hələ rəsmi elan olunmamış kompüterləri gücləndirəcək.

Microsoft 2012-ci ildə Surface RT modelində Nvidia-nın Tegra ARM prosessorlarından istifadə etmişdi. Lakin bu cihaz uğurlu hesab edilməmişdi. Nvidia ARM prosessor bazarında mövqeyini möhkəmləndirməkdə çətinlik çəkib. Bu sahədə yüksək səviyyəni Qualcomm tuta bilib, büdcə seqmentində isə MediaTek önə çıxır. Microsoft, Nvidia və ARM tərəfindən sosial mediada yayılan "PC-nin yeni dövrü" mesajı Qualcomm-un Windows 11-in ARM versiyası üçün eksklüziv lisenziyasının başa çatdığını göstərir.