Myanmanın, əvvəllər Birma kimi tanınan, üsyançıların nəzarətində olan ərazidəki kənddə partlayış nəticəsində azı 55 nəfər həyatını itirib, çoxlu adam yaralanıb.

Çin sərhədinə yaxın Şan əyalətinin Namkham bələdiyyəsində yerləşən Kaung Tat kəndindən məlumat verən mənbə bildirir ki, 25 qadın və 30 kişi ölüb. Digər xəbərlərdə tələfat bir qədər fərqlidir.

Mənbə qeyd edib ki, xilasetmə qrupları dağıntılar altında qalanları axtarır və çıxarır.

Rayona nəzarət edən və Myanmanın hərbi juntası ilə şiddətli döyüşdə olan Ta’ang Milli Azadlıq Ordusu (TNLA) partlayışın mədənçilik və daşaqarma işlərində istifadə olunan partlayıcı səbəbindən baş verdiyini açıqlayıb.

Kənd sakinləri hadisədən sonra dağıntı və çaşqınlıq səhnələri barədə danışıb.

Sosial mediada bəzi sakinlər deyib ki, əvvəlcə partlayışın hava zərbəsi nəticəsində olduğuna inanırdılar.

Postlardan birində bildirilib ki, həlak olanlar arasında uşaqlar da var və yüzlərlə ev zərər görüb, bu isə demək olar ki, bütün kəndi əhatə edib.

Bir sakin yazıb: "Təsadüfən telefonum mənim həyatımı xilas etdi."

O əlavə edib: "Yataq otağımda oturub noodls yeyirdim və telefona baxırdım. Mətbəxdə yesəydim, bəlkə də indi sağ olmazdım."

Ayağından yüngül xəsarət alan və evini itirən sakin partlayışdan sonra təşviş və kədər səhnələrini təsvir edib.

"İnsanlar ağlayır, valideynlərini axtarırdı," o deyib. "Elə bilirdi ki, dünya sonu gəlib çatıb."

Sakin partlayıcı maddələrin yaşadığı yerə yaxın işləməsinə niyə icazə verildiyini soruşub və bildirib ki, həlak olanların ailələri tam izahat olmadan razı qalmazlar.