Silahlı qrup Nigeriyanın şimal-mərkəzində, Niger ştatında məscidə hücum edərək təxminən 600 qadın, uşaq və yaşlı sakinləri qaçırıb. Hadisənin videogörüntüləri yayılıb.

Facebook və WhatsApp-da paylaşılan videoda meşəlik ərazidə, silahlı şəxslərlə əhatə olunan çoxsaylı insanlar görünür. Fonunda bir neçə uşağın ağlamağı eşidilir.

Şimal-qərb və şimal-mərkəzi Nigeriyada girovluq məqsədilə kütləvi qaçırmalar artıb. Bu bölgələrdə silahlanmış dəstələr kəndlərə, məktəblərə və magistrallara basqın edir, girovları yüksək məbləğdə pul alınana qədər saxlayırlar. Zorakılıq əvvəlcə ölkənin şimalında cəmləşmişdi, lakin silahlılar cənuba doğru hərəkət edir.

Video son qaçırmadan iki gün sonra yayılıb. Baş verən hadisədə Dekara kəndində cümə namazı zamanı silahlılar ibadət edənlərə hücum edib. Sakinlərin dediyinə görə, bir neçə ətraf icmada eyni vaxtda insan aparıblar.

Videoda Hausa dilində danışan silahlı girovların yaxınlarına müraciət edərək qohumlarını görüntüdə tanımağı istəyib.

O deyib: “Bunlar hamısı sizin insanlarınızdır. Videonu göstərəndə məqsəd ailə üzvlərinizi, atalarınızı, analarınızı, uşaqlarınızı və qohumlarınızı tanımanızdır.”

Reuters videogörüntünün dəqiq tarixini və yerini təsdiqləyə bilməyib. Lakin video bazar günündən əvvəl onlayn yayımlanmayıb.

Dörd sakin qaçırılanların kimliklərini təsdiqləyə bilib.

İbrahim Abubakar bildirib: “Videodakı şəxslər Dekaradan gəlib. Mən tanıdığım 13 nəfəri müəyyən etmişəm.”

Başqa sakin Abdulmutallib Muqaddas Dindi qeyd edib ki, videogörüntüdə namaz zamanı tutulmuş şəxslər görünür. “Yaşlılarımızı, qohumlarımızı və bəzilərimiz onların arvadları ilə uşaqlarını da videoda görmüşük.”

Polis və dövlət qurumları bazar ertəsi açıqlama verməyib. Polis əvvəlcə bu bölgədə ibadət edənlərə hücumu təsdiqləsə də, qaçırılanların sayını dəqiqləşdirə bilmədiklərini bildirib.

Başqa bir sakin Jamilu İbrahim federal və dövlət orqanlarına müraciət edərək girovların azad olunması üçün tədbir görmələrini istəyib. O, videoda körpəli anaların və uşaqların olduğunu vurğulayıb.