“Microsoft”un potensial startap satınalmaları süni intellekt sahəsində ixtisaslaşmış mütəxəssis heyətini genişləndirməsinə və gələn il qabaqcıl süni intellekt modelinin yaradılması planını reallaşdırmasına kömək edə bilər. Bu barədə üç mənbə məlumat verib.

Bu ilin yazında “Microsoft” kod generasiyası ilə məşğul olan Cursor startapının alınmasını qiymətləndirib. Lakin üç mənbənin bildirdiyinə görə, “Microsoft” bu razılaşmadan geri çəkilib. Buna səbəb şirkətin “GitHub Copilot”a sahib olması fonunda belə bir əməliyyatın tənzimləyici baxımdan çətinliklər yarada biləcəyinə dair daxili narahatlıqlar olub.

“Microsoft” hazırda Stanford Universitetinin komandası tərəfindən 2024-cü ilin ortalarında təsis edilmiş və böyük dil modellərinin hazırlanmasının alternativ üsullarına fokuslanan kiçik Inception startapı ilə danışıqlar aparır. Bu barədə vəziyyətlə tanış olan üç şəxs məlumat verib. “M12” investisiya fondu 2025-ci ilin sonunda Inception-un 50 milyon dollarlıq ilkin investisiya turuna sərmayə qoyub.

Danışıqlar davam edir və yekunda razılaşma əldə olunmaya da bilər.

Inception şərh verməkdən imtina edib.

Süni intellekt bazarında rəqabət getdikcə güclənir. AI sahəsində tədqiqatçılar on milyonlarla dollar və daha yüksək məbləğdə əməkhaqqı tələb edə bilirlər. Startapların dəyərləndirilməsi də artmaqda davam edir, investorlar perspektivli AI texnologiyalarına sərmayə qoymaq üçün yarışırlar.

“Microsoft”un rəqibləri arasında İlon Maskın (Elon Musk) “SpaceX” şirkəti də var. “SpaceX” fevral ayında Maskın AI tədqiqat startapı “xAI”ni alıb və “Microsoft”un Cursor razılaşmasından imtina etməsindən dərhal sonra Cursor ilə razılaşma əldə edib.

“SpaceX” həmçinin Inception ilə də maraqlanıb. Vəziyyətlə yaxından tanış olan bir şəxsin sözlərinə görə, Inception yaxın vaxtlarda razılaşmanın müzakirəsi üçün bir bankla əməkdaşlığa başlayıb və startapın qiymətləndirilməsi 1 milyard dollardan çoxdur.

“SpaceX” mövzu ilə bağlı hələlik rəsmi açıqlama verməyib.

Ən qabaqcıl AI laboratoriyaları təxminən 10 trilyon parametrlik modellərin yaradılması üzərində işləyir ki, bu da üç il əvvəlki 1 trilyon parametr səviyyəsindən xeyli yüksəkdir.

Inception-un modelləri difuziya texnikasından istifadə etməklə mətn generasiya edir. Bu metod əsasən süni intellektdə təsvir və video yaradılması üçün tətbiq olunur. Adi modellər bir vaxtda bir token generasiya etdiyi halda, difuziya metodu eyni anda bir neçə tokeni yaradır və onları tədricən təkmilləşdirir. Bu üsul modelin sürətini əhəmiyyətli dərəcədə artırır.