Kuba Kommunist Partiyası fövqəladə iqtisadi paket çərçivəsində misli görünməmiş azad bazar tədbirlərini təsdiqləyib.

Bu paket ölkənin Milli Məclisinə cümə günü təqdim olunub və oradan keçməsi demək olar ki, qaçılmazdır.

Plan özəl sahibkarlıq imkanlarını genişləndirəcək və xaricdə yaşayan Kubalılar da daxil olmaqla əlavə xarici investisiyaların cəlb olunmasını təmin edəcək.

Eyni zamanda, Karib adasında özəl daşınmaz əmlak inkişafı üçün zəmin yaradacaq və dövlət müəssisələrinin səhmlərlə özəl kommersiya qurumlarına çevrilməsini təmin edə bilər. Bu tədbir dövlət nəzarətində olan maliyyə sektoruna özəl bankların daxil olmasına da imkan yaradacaq.

Bu islahat paketi Kubaya 1965-ci ildən rəhbərlik edən Kommunist Partiyası üçün böyük dönüşdür.

Cümə günü partiyanın Mərkəzi Komitəsinə çıxış edən Prezident Miguel Diaz-Kanel ölkənin ağır iqtisadi vəziyyətinin yalnız xarici təzyiqlə izah oluna bilməyəcəyini bildirib.

ABŞ illərdir Kubaya ticarət embarqosu tətbiq edir və bu, ölkənin iqtisadiyyatını zəiflədib. Yanvar ayından etibarən ABŞ-ın Kuba üzərində təzyiqləri artıb, prezident Donald Tramp administrasiyası isə adaya yanacaq tədarüklərini bloklayıb.

Lakin Diaz-Kanel deyib ki, hazırkı çətinliklərin bir hissəsi daxili amillərdən yaranır və blokadadan qaynaqlanmayan maneələr mövcuddur.

O, istehsal etmək istəyənlərin qarşısını alan yavaşlıq, bürokratiya və qaydalarla, eləcə də tətbiq edilməyən qərarlarla bağlı danışıb.

“Vəziyyət təcili və zəruri dəyişikliklər tələb edir”, - Prezident vurğulayıb.

Cümə günü Avropa İttifaqı da Kubaya təzyiqləri artıraraq, Diaz-Kanel və Kuba ordusunun idarə etdiyi Grupo de Administracion Empresarial SA şirkətinin rəhbərliyi üzərində sanksiyalar tələb edən qətnamə qəbul edib.

Avropa İttifaqının qətnaməsində Kuba hökumətinin sistemli repressiyaları pislənir və dərin iqtisadi, siyasi dəyişikliklər tələb olunur.

Çıxışında Diaz-Kanel bəzi Kommunist Partiyasındakı sərt xətt nümayəndələrinin fövqəladə iqtisadi paketə qarşı çıxa biləcəyini deyib.

O, bəzi islahatların tam razılıqla qəbul edilməyəcəyini, lakin təxirə salınmamasının vacib olduğunu qeyd edib.

May ayında ABŞ tərəfindən ittiham edilən keçmiş Kuba lideri Raul Kastro da planı dəstəkləyib.

Tramp administrasiyasının rəsmiləri, xüsusilə Dövlət Katibi Marko Rubio iqtisadi islahatların Vaşinqtonun adaya qarşı təzyiq kampaniyasını yüngülləşdirə biləcəyini bir neçə dəfə bildirib, lakin ABŞ son addımlara dərhal reaksiya verməyib.

Bu arada ABŞ vitse-prezidenti Cey-Di Vens cümə günü deyib ki, İranla müharibənin dayandırılması ilə bağlı memorandumun imzalanmasından sonra administrasiya indi Kubaya yönələcək.

Tramp dəfələrlə hərbi hücumları və Kubanın “dostcasına ələ keçirilməsi” planını səsləndirib.

Vens Vaşinqtonun kubalıların “xoşbəxt və uğurlu olmasını” istədiyini vurğulayıb.

“Hazırda Kubanın hökuməti ilə onların vəziyyəti dəyişmək üçün yollarını necə dəyişəcəyi barədə danışıqlar aparırıq”, - o deyib.

“Ağıllı qərarlar verilərsə, adayla münasibətlərimiz daha yaxşı olacaq.”