İsveçrə Alp dağlarındakı Trift Buzlağının davam edən əriməsi iki kişinin cəsədini üzə çıxarıb.

Polis bildirib ki, 1992-ci ildə İsveçrə Alp dağlarında itkin düşən iki belçikalı kişinin meyitləri buzlağın əriməsi ilə tapılıb.

Rəsmi şəxslərin məlumatına görə, 26 iyulda İsveçrənin Lötsern şəhərinin cənubundakı Trift Buzlağında bir gəzintçi meyitləri aşkarlayıb.

Sonradan aparılan DNA analizi meyitlərin 34 il əvvəl Weissmies dağı yaxınlığında itkin düşən iki dağçıya məxsus olduğunu müəyyən edib. İtkin düşdükləri vaxt onların yaşları 39 və 41 olub.

Glacier Monitoring in Switzerland (Glamos) təşkilatının məlumatına görə, 2025-ci ilə qədər on il ərzində İsveçrədə buzlaqlar dörddə bir hissə azalıb. Bir çox alim buzlaqların sürətlə geri çəkilməsini iqlim dəyişikliyi ilə izah edir.

Valais bölgəsinin polis idarəsi açıqlayıb ki, iki kişinin meyitləri tapılandan sonra axtarış aparılıb və meyitlər tanınma məqsədilə kantonun paytaxtı Siondakı xəstəxanaya göndərilib.

Weissmies dağı 4 min metrdən yüksəkdir və Saas vadisində məşhur dağçılıq məkanıdır. İtkin düşən şəxslər də bu ərazidə olub.

1925-ci ildən bəri Valais regionunda itkin düşən şəxslərin məlumat bazası saxlanılır. Polis qeyd edir ki, bazadakı şəxslərin çoxu dağlarda, çaylarda və digər su hövzələrində itkin düşüb.

Polis bildirir ki, buzlaqların əriməsi nəticəsində on illər öncə itkin düşən insanların qalıqları ilk dəfə tapılmır.

2023-cü ildə isə İsveçrənin məşhur Matterhorn yaxınlığındakı buzlaqda insan qalıqları tapılıb. Onların 1986-cı ildən itkin düşmüş alman dağçısına aid olduğu təsdiqlənib.

Avropa Komissiyasının müşahidə agentliyi Copernicus bildirir ki, buzlaqlar 1990-cı illərdən başlayaraq geri çəkilir və bu proses 2000-ci ildən sürətlənib.

İsveçrədə buzlaqların əriməsi xüsusilə çox hiss olunur. Glamos təşkilatının məlumatına əsasən, 2022 və 2023-cü illərdə buz itkisi rekord səviyyədə olub, 2025-ci ildə isə buzlağın həcmi əlavə 3 faiz azalıb.

Qlobal istiliyin artması İsveçrənin yüksək dağlıq bölgələrində mövsüm xarakterli isti hava şəraiti yaradıb. Qarın azalması isə bəzi xizək kurortları və yarışlar üçün təhlükə yaradır.