Dünya birincisi Aryna Sabalenka ABŞ Açıq turnirində üçüncü mərhələ matçı zamanı qeyri-adi hal yaşayıb. O, oyunu dayandıraraq Louis Armstrong Stadionunun kortuna yayılan güclü marixuana iyindən hakimi xəbərdar edib.

Sabalenka, Özbəkistan təmsilçisi Kamilla Raximova üzərində sürətli başlanğıcla 3-0 öndə olduqdan sonra cümə günü ikinci xidmət oyununda bu barədə hakimi məlumatlandırıb və oyunu davam etdirməzdən əvvəl bu məsələni diqqətə çatdırıb.

"Kimsə marixuana çəkir," - Sabalenka 30-0 xidməti zamanı hakim Eva Asderaki-Muoraya deyib. "Xahiş edirəm... iy çox güclüdür."

Sonra Sabalenka jurnalistlərə bildirib ki, heç kimə əylənməyə mane olmur, lakin kortun ətrafında siqaret çəkilməməsini xahiş edib.

Gülərək Sabalenka deyib: "Dedim ki, dostlar, istədiyinizi edə bilərsiniz, nə istəsəniz çəkə bilərsiniz, istədiyiniz qədər dincələ bilərsiniz, amma xahiş edirəm, tenis kortlarının yanında bunu etməyin. Bu iy ilə rəqabət aparmaq çətindir."

Marixuana iyisi Flushing Meadows-da tanış, amma xoşagəlməz haldır. Oyunçular əvvəllər də bu narahatlığı vurğulayıblar.

Turnir sahəsində siqaret çəkmək qadağandır, lakin Nyu-Yorkda 21 yaşdan yuxarılar üçün əyləncə məqsədli marixuana qanunidir və Flushing Meadows-Corona Parkından yayılan tüstü tennis kompleksinə, kortlara daxil olur.

Sabalenka deyib ki, turnir ərzində marixuana iyini əvvəllər də hiss edib, ancaq heç vaxt matç zamanı bu qədər güclü olmayıb. Cümə günü əsən küləyin iyini stadion daxili məkanlara gətirdiyi ehtimal edilir.

O əlavə edib: "Həqiqətən güclü idi. Üstəlik, bir az da külək vardı. Bilmirəm, tamaşaçılardan gəlirdi, yoxsa kənardan, çünki külək onu stadiona aparır."

Mövzuya yenidən toxunan Sabalenka gülərək əlavə edib: "Ümid edirəm, insanlar bir az daha diqqətli olar. Gəlin, dostlar, marixuana ilə bağlı başqa deyiləsi bir şey yoxdur. Mən sadəcə insanlardan tennis kortunun yanında siqaret çəkməməyi xahiş edirəm."