Cümə günü ordu kazarmasında baş vermiş partlayış nəticəsində ən azı 10 nəfər həyatını itirib, 59 nəfər yaralanıb. Boliviyanın yerli hakimiyyəti məsələ ilə bağlı məlumat verib.

İlkin xəbərlərdə polis azı iki nəfərin öldüyünü, bir neçə şəxsin isə itkin düşdüyünü bildirmişdi.

Partlayışla bağlı məlum olanlar

Hakimiyyət orqanlarının açıqlamasına görə, partlayış saat 14:30-da (18:30 GMT) pirotexniki materialların saxlandığı ərazidə baş verib.

Hadisə paytaxt La Pazdan təxminən 30 kilometr aralıda, Viaça şəhərinin qərbində yerləşən hərbi bazada, atəşfəşanlıq materiallarının saxlandığı yerdə qeydə alınıb. Lakin partlayışın səbəbi hələ müəyyənləşdirilməyib.

Müdafiə naziri Ernesto Justiniano Facebook-da paylaşımında məlumat verib ki, yaralanan 52 nəfər mülki şəxs, qalanları isə hərbi qulluqçulardır.

Viaça şəhərinin səhiyyə direktoru Rita Nebraska yerli televiziyaya deyib ki, ölənlərin sayı 10-15 nəfər arasında ola bilər.

O bildirib ki, yaralananlardan 14 nəfər La Paz xəstəxanalarına yerləşdirilib. Onlar arasında üçüncü dərəcəli yanıq xəsarəti alan bir qız var.

Polisin sözçüsü Roger Roca yeddi nəfərin itkin olduğunu qeyd edib.

Polisin məlumatına görə, partlayış nəticəsində bir neçə evə zərər dəyib, pəncərələr sınıb.

Yeni partlayış təhlükəsi davam edir

Nebraska bildirib ki, yanğınsöndürənlər ərazidə istilik mənbəyinin mövcud olduğunu xəbərdar edib. Bu isə növbəti partlayış riskini artırır. Sakinlərdən ən azı 150 metr məsafədə qalmaqları tələb olunur.

Hadisə yerində xilasedicilər, tibb işçiləri və təcili yardım maşınları fəaliyyət göstərir. Onlar yaralılara kömək edir və ziyanın qiymətləndirilməsini aparırlar.