SpaceX tarixi IPO-dan öncə növbəti hesablama müqaviləsini Google ilə bağlayıb. Şirkət bu razılaşmanı cümə günü tənzimləyici sənəddə açıqlayıb.

Razılaşmaya görə, Google 2026-cı ilin oktyabrından 2029-cu ilin iyununa qədər ayda 920 milyon dollar ödəyəcək və “təxminən 110,000 NVIDIA GPU, CPU, yaddaş və digər əlaqəli komponentlər”ə çıxış əldə edəcək.

Bu razılaşma, SpaceX-in may ayının sonunda açıqladığı Anthropic ilə müqavilə kimi müddət və əhatə baxımından oxşardır. Anthropic 2029-cu ilə kimi ayda 1,25 milyard dollar ödəməyi qəbul edib və Tennessee ştatının Memphis yaxınlığında yerləşən Colossus 1 məlumat mərkəzindən SpaceX-in törəmə şirkəti olan xAI üçün hesablama gücünü icarəyə götürür.

Google isə Anthropic-in istifadə etdiyi gücdən təxminən yarısı üçün ödəniş edir. SpaceX Google-un hansı məlumat mərkəzindən istifadə edəcəyini açıqlamayıb. Şirkətin CEO-su Elon Mask daha əvvəl bildirib ki, şirkət Colossus 2 məlumat mərkəzini xAI üçün saxlayacaq.

Həmçinin Anthropic ilə müqavilədə olduğu kimi, Google ilə razılaşmada da ləğv etmə müddəti var. Hər iki tərəf 31 dekabr 2026-cı ildən sonra 90 gün əvvəl xəbərdarlıqla müqaviləni dayandıra bilər. Sənədə görə, Google məlumat mərkəzinə çıxış "sentyabra qədər azaldılmış ödənişlə" tədricən artırılacaq.

"Əgər 30 sentyabr 2026-cı tarixinədək öhdəlikdə göstərilən GPU sayını təmin edə bilməsək, bir aylıq güzəşt müddətindən sonra Google dərhal müqaviləni ləğv edə və ya təqdim olunan GPU sayını qəbul edərək aylıq ödənişdə endirim əldə edə bilər" - sənəddə qeyd olunub.

SpaceX bu razılaşmanı şirkətin Nasdaq birjasında səhm satışından cəmi bir həftə əvvəl açıqlayıb. Qıymətli kağızlar və birjalar komissiyasına təqdim edilən sənədlərdə şirkətin təxminən 75 milyard dollar toplamağı və 1,75 trilyon dollar dəyərdə qiymətləndirilmə alması planlaşdırılır ki, bu da tarixin ən böyük IPO-su olacaq.

Google uzun müddətdir SpaceX-in investoru hesab olunur. IPO-dan sonra şirkətdəki payının 100 milyard dollardan çox dəyərdə olacağı gözlənilir. Şirkətlər həmçinin məlumata görə orbital məlumat mərkəzləri qurmaq üçün danışıqlar aparırlar ki, bu da IPO-dan sonrakı SpaceX-in əsas planlarından biridir.

Hadisə inkişaf edir. Yeniliklər üçün bizi izləyin.