Avstraliya məhkəməsi Erin Patterson haqqında apellyasiya məhkəməsinin keçirilməsi barədə qərar verib. O, "göbələk qatili" adı ilə tanınır. Apellyasiya dinləməsi avqustda baş tutacaq.

Viktoriya Ali Məhkəməsi cümə günü açıqlayıb ki, dinləmə avqustun 19-u və 20-də keçiriləcək. Pattersonun vəkilləri noyabrda onun ömürlük həbs cəzasına apellyasiya şikayəti vermiş, məhkəmə prosesində ədalətsizlik olduğunu bildiriblər.

Patterson sentyabr ayında ömürlük həbsə məhkum edilib. O, uzaqlaşdığı həyat yoldaşının üç yaxın qohumunu zəhərli göbələk qarışığı ilə hazırlanmış nahar təqdim edərək öldürməkdə təqsirli bilinib.

İki günlük dinləmə zamanı məhkəmə həmçinin prokurorların apellyasiyasını da dinləyəcək. Prokurorlar hesab edirlər ki, onun 33 ildən sonra azadlıq şərti ilə azad edilmək ehtimalı olan cəzası kifayət qədər ağır deyil.

Prokurorlar ilk məhkəmə prosesində onun cəzasının şərtsiz ömürlük həbs olmasını tələb ediblər, lakin iddiaları qəbul olunmayıb.

İyul ayında jüri Pattersonu günahkar bilib. O, uzaqlaşdığı həyat yoldaşının valideynlərini zəhərli göbələk əlavə olunmuş mal əti ilə verilən naharla öldürməkdə təqsirli sayılıb.

Məhkəmə işi dünya üzrə geniş maraq yaradıb. 250-dən çox jurnalist məhkəmədən məlumat almaq üçün qeydiyyatdan keçib və hakim cəza prosesinin canlı yayımlanmasına qərar verib.

Həm Gail Patterson, həm də Donald Patterson 2023-cü ilin avqustunda vəfat edib. Erin Patterson həmçinin Gailin bacısı Heather Wilkinsonun da həmin ay hayatını itirməsində günahlandırılıb. O, həmçinin Wilkinsonun həyat yoldaşı Ianı öldürməyə cəhd göstərib. Ian zəhərlənmədən sonra yeddi həftə xəstəxanada qalıb və qaraciyər transplantasiyası alıb.

Patterson öz məhkumluğuna yeddi əsas səbəbdən apellyasiya verib. Onların arasında jürinin saxlanma şəraiti ilə bağlı narazılıq var. Məhkəmə işi zamanı jürinin işin əsas iştirakçıları, o cümlədən polis şahidi və iki prokurorla eyni oteldə qalması vəkillər tərəfindən əsaslı pozuntu kimi qiymətləndirilir.

Vəkillər bildirilər ki, məhkəmədə təqdim olunan bir çox sübut ya əlaqəsiz, ya da ədalətsiz qərəzli olub. Müdafiə tərəfi prokurorların suallarını ədalətsiz və təzyiqedici adlandırır.

Patterson günahsız olduğunu müdafiə edir və zəhərlənmənin təsadüfi baş verdiyini bildirir.