Ötən il Almaniyanın sənaye və enerji sektoru gözləniləndən az karbon emissiyası buraxıb. Bu isə əsasən yenilənə bilən enerji mənbələrinin artması ilə deyil, dayanıqlı olmayan iqtisadiyyatla izah olunur.

Bu məlumatları Almaniyanın İqlim Dəyişiklikləri üzrə Ekspert Şurası açıqlayıb. Şura hökumətə iqlim məqsədlərinə çatmaq üçün ən yaxşı yolları məsləhət verir və ölkənin iqlim siyasətinin effektivliyi ilə bağlı hesabatlar hazırlayır.

Almaniya 2045-ci ilə qədər net istixana qazı neytrallığına, 2050-ci ildən isə net mənfi emissiyalara nail olmaq istəyir. Lakin hazırkı tədbirlər bu məqsədlərə çatmaqda uğursuzluq göstərir, deyə şuranın sədri Barbara Şloman bildirib.

Nəqliyyat və tikinti sektoru xüsusilə iqlim hədəflərindən geri qalır.

Müsbət cəhət olaraq, Almaniyanın meşələri bərpa olunmaqda davam edir. Onlar həyati karbon uducularıdır və atmosferdən istixana qazlarını əmməklə biosferaya çevirirlər.

Külək enerjisi müzakirəlidir, amma əvəzsizdir

Ümumilikdə isə meşələr, bataqlıqlar, otlaqlar və kənd təsərrüfatı sahələri kimi karbon saxlayan ekosistemlər istixana qazı buraxanlara çevrilir. Məsələn, bataqlıqlar qurudulduqda içərisində saxlanılan karbon qazı sərbəst buraxılır. Əgər tədbir görülməzsə, bu karbon uducular 2050-ci ilə qədər qlobal istiləşməni sürətləndirə bilər. Almaniya hökuməti bu tendensiyanı geri çevirmək istəyir.

Şura hökumətə iqlim qoruma siyasətlərini vahid və məntiqli siyasi strategiyaya birləşdirməyi təklif edir.

Şura üzvü Yulya Pongrats bildirib ki, dairəvi iqtisadiyyatın gücləndirilməsi, sənayenin elektrikləşdirilməsi və davamlı qida vərdişlərinin təşviqi doğru addımlardır, lakin bu kifayət etmir.

Alman kəndində enerji xərcləri kəskin azaldıldı

O, qərar verənlərin sosial xərclərin və iqtisadi nəticələrin ədalətli paylanmasına daha çox diqqət yetirməli olduğunu qeyd edib.

Almaniyanın iqlim izinə ən çox təsir edən sektorlar sənaye, enerji və nəqliyyatdır. Ekspertlər nəqliyyat sektorunun yenilənə bilən enerji mənbələrinə keçid və elektrik şəbəkəsinin, batareyaların, enerji doldurma infrastrukturunun müasirləşdirilməsi ilə ekoloji təmiz hala gələ biləcəyini bildirir.

Məhdud irəliləyiş

Almaniya məhkəməsi hökuməti iqlim qoruma tədbirlərini gücləndirməyə məcbur etdikdən sonra qanunvericilər mart ayında əlavə tədbirlər paketini təqdim edib.

Proqram külək enerjisinin genişləndirilməsini sürətləndirməyi, bioyanacaq istehsalını artırmağı, elektrikli avtomobillərin (EV) və yerli nəqliyyatın inkişafını, sənaye istehsalında təbii qaz yerinə elektrik enerjisinin istifadəsini təşviq etməyi hədəfləyir.

Almaniyanın İqlim Dəyişiklikləri üzrə Ekspert Şurası hesab edir ki, bu addımlar kifayət qədər irəli getmir: "Bu o deməkdir ki, hələ də istixana qazı emissiyalarının azaldılması üçün konkret plan yoxdur." Ekspertlər xəbərdarlıq edirlər ki, yeni proqramın emissiya azalma hədəfləri tam həyata keçirilərsə belə, Almaniya iqlim hədəflərinə çatmayacaq.

Şloman deyib ki, bir çox infrastruktur məsələ hələ həll edilməyib. İctimai dəstəyin artırılması üçün də təşəbbüslər olmalıdır.

Almaniya Ətraf Mühit Naziri Karsten Şnayder bildirib ki, şuranın tapıntılarını ciddi qəbul edir və onları diqqətlə təhlil edəcək.

O əlavə edib ki, yeni iqlim proqramının, xüsusən elektrik avtomobillərinin istifadəsinin təşviqinin ardıcıl həyata keçirilməsinin vaxtı çatıb.

Şnayder deyib: "Ekspertlərin xəbərdarlığına ən vacib cavab yenilənə bilən enerji mənbələrinə tam üstünlük verməkdir. İkinci əsas addım Avropa İttifaqının emissiya ticarət sisteminin islahıdır."

Bu addım sənaye və enerji sektorunu elektrik enerjisinə keçməyə təşviq edəcək.

Almaniyanın İqlim Dəyişiklikləri üzrə Ekspert Şurası hökumətin tədbirlərinin iqlim üzrə qanuna uyğunluğunu da yoxlayır.

Bu məqalə alman dilindən tərcümə olunub