Avropada bu həftə qeyri-adi istilik dalğası yaşanıb. Davamlı yüksək təzyiq zonası altında bir neçə ölkədə temperatur rekordu qırılıb. Bu hadisə “isti dom” kimi tanınır. Birləşmiş Krallıq may ayının maksimum temperaturunu ötüb. Çərşənbə axşamı Londonda, Kyu Bağlarında 35,1°C qeydə alınıb.

Bu, əvvəlki rekorddan yüksəkdir. Bir gün əvvəl, bazar ertəsi Londonda 34,8°C ölçülmüşdü. Əvvəlki maksimum temperatur rekordu 1922-ci ildə 32,8°C, 1944-cü ildə isə təkrarlanmışdı. İrlandiyada da may ayının maksimum temperaturu yenilənib. Cənub-qərbdə Killarney və cənubda Clonmel hava stansiyalarında 28,8°C ölçülüb.

Yalnız maksimum temperatur deyil, gecə minimumları da rekord həddə yüksəlib. Çərşənbə axşamı gecəsi cənub-qərbi İngiltərədə Camborne şəhərində temperatur 21,4°C-ə düşüb. Bu, 20°C-dən yüksək temperaturun qorunduğu tropik gecələrdən biridir.

Fransada bazar ertəsi və çərşənbə axşamı 36°C temperatur qeydə alınıb. Bu, yaz aylarında ən yüksək temperatur göstəriciləridir. Fransız hökumətindən bildiriblər ki, istilik bu həftə yeddi insanın ölümünə birbaşa və ya dolayı yolla səbəb olub.

Avropanın bir hissəsində may ayının temperaturu orta göstəricidən 10-15°C yüksəkdir. Həftənin sonunadək temperatur orta göstəricidən 5-10°C yüksək qalacaq. Lakin növbəti həftədən Birləşmiş Krallıqda temperatur tədricən düşməyə başlayacaq.

Avstraliyanın şərqi və cənub-şərq hissələrində bu həftə güclü ildırım fırtınalarının olacağı barədə xəbərdarlıqlar verilib. Bu xəbərdarlıqlar cümə gününədək davam edəcək. Meteorologiya Bürosu (BoM) zərərverici külək, güclü yağış və dolunun gözlənildiyini bildirib. Eyni zamanda, müxtəlif yerlərdə ani daşqın riski var. Çərşənbə günü Kvinslendin Dayboro şəhərində 30 dəqiqə ərzində 50 millimetr yağış, Yeni Cənubi Uelsin Narrabi şəhərində isə 104 km/saat külək müşahidə olunub.

BoM məlumatına görə, həftənin sonuna qədər Yeni Cənubi Uelsdə Mid Nort Kost, Apper Hantər və yaxın bölgələrdə 6 saat ərzində 40-70 millimetr, bəzi yerlərdə isə 100 millimetr yağış yaça bilər.