Xorvatiya Prezidenti İsrailin yeni səfirini “hal-hazırkı İsrail hakimiyyətlərinin siyasətləri” səbəbindən təsdiqləməkdən imtina edib.

Prezident Zoran Milanoviçin ofisi bazar ertəsi bildirib ki, İsrailin ölkəyə təklif etdiyi səfir təsdiqlənməyəcək. Xorvatiya prezidenti Qəzzaya qarşı İsrailin soyqırımı müharibəsinin qəti tənqidçisidir.

Bəyanatda deyilir: “İsrail Dövləti tərəfindən təklif olunan səfir Respublikamızın Prezidenti Zoran Milanoviçdən razılıq almayıb və bundan sonra da almayacaq.”

Prezident Milanoviç bildirib ki, bu vaxta qədər diplomatik ənənələrə uyğun olaraq məsələ haqqında ictimaiyyətə şərh verməkdən çəkinib, lakin İsrail razılığı almadan təklif olunan səfirini açıqlayaraq “yazılmamış qayda”nı pozub.

İsrail Xarici İşlər Nazirliyi Times of Israel saytı vasitəsilə yayılan bəyanatında bildirib ki, “Zaqrebdə İsrailin növbəti səfirinin statusu məsələsini həll etmək” üçün Xorvatiyanın rəsmi şəxsləri ilə əməkdaşlıq aparır.

İsrailin Qəzzada və Yaxın Şərqdə hərbi təcavüzü fonunda Xorvatiya ilə İsrail arasındakı gərginlik böyüyür.

Fevral ayında Milanoviç açıqlayıb ki, Xorvatiyanın silahlı qüvvələrinin üzvləri “qəbuledilməz hərəkətləri və beynəlxalq humanitar qanunun misli görülməmiş tapdalanması səbəbindən” İsrail ordusu ilə əməkdaşlıq etməyəcəklər.

Mart ayında o,ABŞ-İsrailin İranla müharibəsini pisləyərək bildirib ki, Tehranı idarə edən hakimiyyəti dəyişdirmək arzusu “iqtisadi zərərlərə” və uzunmüddətli nəticələrə səbəb ola bilər.

Nissan Amdur mayın sonunda müddəti bitən səfir Gary Korenin yerinə təyin olunub. Ynet xəbər verir ki, Amdur indi Xorvatiyaya səfir müvəqqəti vəzifəsi ilə gedəcək, bu isə prezident təsdiqi tələb etmir.

Məlumatlı mənbə bildirib ki, Milanoviç “yaxın keçmişdə açıq-aydın İsrailə qarşı və antisemitik fikirlər söyləmiş problemli siyasi fiqurdur.”

Hesabatda bildirilir ki, bu, Xorvatiya tarixində bir prezidentin səfir təyinini rədd etdiyi ilk haldır.

Milanoviç bildirib ki, “təklif olunan səfirlərə razılıq vermək və ya verməmək prezidentin suveren hüququdur.”

Milanoviç 2020-ci ildən vəzifədədir və İsrail tərəfdarı olan mühafizəkar hökumətdən fərqli baxışlara sahib solçu partiyanın üzvüdür.

Səlahiyyətləri məhdud olsa da, səfir təyinatlarını təsdiq etmə sahəsi onun səlahiyyətindədir.