Bernd Vaqqner yeni şirkətinin idarə heyətində olanda böyük həyəcan hiss edir. O, Eiffel qülləsinin tikintisində istifadə olunan poladdan yeddi dəfə çox, Neapol boyu uzanan kabellərdən danışır.

Vaqqner Schwarz Digits şirkətində bulud texnologiyaları və satış şöbəsinə rəhbərlik edir. Yeni idarəetmə mərkəzinin qurulmasına çoxlu polad və kabel xərclənib. Obyekt 21 iyul 2026-cı ildə istifadəyə veriləcək.

Kampus 3 500 işçiyə hesablanıb, uşaq bağçası, restoran və idman imkanları ilə təmin olunub. Onun görünüşü "Amazon", "Apple" və "Google"un qərargahlarını xatırladır.

Bad Fridrişsallda, Almaniyanın cənubunda yerləşən yeni ofislər Vaqqnerin rəhbəri Dieter Şvarsın doğulduğu Heilbronn şəhərinə yaxındır. Dieter Şvars Almaniyanın ən zəngin iş adamıdır və supermarket imperiyasını burada qurub. Schwarz Qrupunda 600 mindən çox adam çalışır.

"Lidl" və "Kaufland" supermarket zəncirləri qrupun inkişafında əsas rol oynayıb. Şirkət ərzaq istehsalı, tullantıların idarə olunması və rəqəmsallaşma sahələrində də fəaliyyət göstərir.

Ötən il Schwarz Qrupu 185 milyard avro gəlir əldə edib ki, bu "SAP", "Mercedes" və "Bayer"dən çoxdur. Almaniyada yalnız "Volkswagen" daha çox gəlir götürüb.

Şirkətin qurucusu Dieter Şvars gizliliklə seçilir, ona aid şəkillər çox azdır. O, Heilbronn şəhərində sərbəst dolaşır.

Almaniyanı biznes mərkəzi kimi görürlər

Schwarz Qrupu rəqəmsal müstəqillik və innovasiyalar üçün Almaniyanın mərkəz olmasına önəm verir. Vaqqner deyir ki, "Masada yoxsa, menyuda olursan".

Son illərdə Schwarz Digits dünya üzrə 14 500 supermarketin IT infrastrukturunu idarə edib. İndi isə bulud və təhlükəsizlik xidmətlərini bizneslərə və dövlət qurumlarına təqdim edir.

Vaqqnerin sözlərinə görə, məqsəd Almaniya və Avropanın ABŞ və Çin texnologiyasına asılılığını azaltmaqdır: "Avropanın hərəkət qabiliyyətini bərpa etmək istəyirik".

Schwarz Digits Hollandiya hökuməti, Almaniya nazirlikləri və Almaniya Futbol Federasiyası ilə əməkdaşlıq edir.

Berlinin cənubundakı Spreevald bölgəsində Schwarz Digits üçün 11 milyard avro dəyərində məlumat mərkəzi tikilir. Bu şirkətin ən böyük sərmayəsidir.

Yeni qərargahın xərci açıqlanmayıb. Obyekt IT mütəxəssislərinin cəlb olunması və saxlanması üçün nəzərdə tutulub. Vaqqner vurğulayır ki, "Bahalı Silicon Valley-ə köçmək əvəzinə, gələcəyi Almaniyanın cənubunda qurmaq lazımdır".

Heilbronn bilik şəhərinə çevrilir

Dieter Şvars uğurun insan, istedad və təhsildən asılı olduğunu erkən başa düşüb. 1999-cu ildən fəaliyyətdə olan onun fondu təhsil, elm, tədqiqat və sahibkarlığa dəstək verir. Heilbrnonda sabahın istedadlarının inkişafını görmək mümkündür.

Fondun təhsil kampusunda 8 minədək tələbə təhsil alır, bu say artırılacaq.

Şəhərdə yerləşən Experimenta Almaniyanın ən böyük elm mərkəzidir. Burada ziyarətçilər süni intellekt və texnologiya ilə tanış olur. Experimenta şəhərin simvoluna və əsas turizm məkanına çevrilib.

Heilbronnun meri Herri Mergel 20 il əvvəl Experimentanın yaradılmasına təşəbbüs göstərib. Dieter Şvars şəhərdə yaşamağa davam edir və gizliliyi üstün tutur. Mergel deyir ki, "Hər kəs anonimlik hüququna malikdir".

Megalayihə: Süni İntellekt Kampusu

Mergel bildirir ki, Schwarz Qrupu və Dieter Schwarz Fondu Heilbronnun bilik şəhərinə çevrilməsində mühüm rol oynayır.

Şəhər əvvəllər "Heilbronx" ləqəbi daşıyırdı, indi isə Almaniyanın ən yüksək satınalma gücünə malik şəhərlərindən biridir. Hindistan və Çindən sakinlərin sayı artır, bu da IT sahəsində iş imkanlarına işarə edir.

Tezliklə şəhərin beynəlxalq nüfuzunu artıracaq layihə hazırlanır. IPAİ (Süni İntellekt İnnovasiya Parkı) ilə Heilbronn London və Paris kimi şəhərlərlə rəqabət aparmağı planlaşdırır.

Layihə 2027-ci ildə istifadəyə veriləcək, burada 5 minədək şəxs işləyəcək və tədqiqat aparacaq. Dieter Schwarz Fondu və Schwarz Qrupu əsas roldadır.

Layihənin ümumi xərci açıqlanmayıb. IPAİ 2022-ci ildən fəaliyyət göstərir və hazırda 140 şirkət və tərəfdaş burada süni intellekt sahəsində işləyir.

Herri Mergel deyir ki, "Süni intellekt olmadan heç bir şirkət, sənaye və idarəetmə rəqabətcil qala bilməz". Ona görə IPAİ bölgənin sığortasıdır. "Gələcək Heilbronnda qurulur".