ABŞ-ın ondan çox aparıcı iş adamı Prezident Donald Trampla birlikdə Çinə rəsmi səfərdə iştirak edir. Səfər zamanı onlar Çin Prezidenti Si Cinpinlə ticarət, texnologiya və süni intellekt məsələlərini müzakirə edirlər.

Çərşənbə günü Pekinə çatarkən Tramp Siyə deyib ki, onlarla birgə olan qrup "Amerika işgüzar dairələrinin seçilmiş nümayəndələri"dir və "hamısı Çini hörmət edir və dəyərləndirir". Xinhua agentliyinin məlumatına görə, heyət Çin bazarını yüksək qiymətləndirir və burada bizneslərini genişləndirməyi arzulayır.

Çin Prezidenti qarşı tərəfi "qarşılıqlı faydalı əməkdaşlığı“ artırmağa dəvət edib və bildirib ki, amerikalı şirkətlərin Çində perspektivləri geniş olacaq.

Bu səfər iki ölkə arasındakı uzunmüddətli ticarət münaqişəsinin fonunda baş verir. Trampın ötən il tətbiq etdiyi yüksək tariflər Çin tərəfindən eyni qaydada cavablandırılıb.

Tramp və Si oktyabrda keçirilən görüşdə razılaşdırdıqları tariflərin bir illik atəşkəsinin uzadılması və Çin nadir torpaq metallərinin ixracı ilə bağlı məsələləri müzakirə edəcəklər.

Trampın müşayiətində olan heyətdə SpaceX və Tesla şirkətlərinin rəhbəri İlon Mask, Apple şirkətinin icraçı direktoru Tim Kuk və Goldman Sachs bankının rəhbəri Devid Solomon da var.

Mask keçən il Trampla bəzi ziddiyyətlər yaşasa da, səfərə onunla birlikdə gəlib. Bundan başqa, BlackRock-un rəhbəri Lerri Fink, Citi bankının rəhbəri Ceyn Freyzer, Blackstone şirkətinin rəhbəri Stiven Şvartsman və Boeing şirkətinin prezidenti Kelli Ortberg də səfərdədir.

Səfərə son anda Nvidia şirkətinin rəhbəri Censin Huang da qoşulub.

Digər təmsil olunan şirkətlər arasında Meta, Cargill, Visa, Cisco, Qualcomm, Coherent, Micron, GE Aerospace, Illumina və Mastercard var.

Trampla səfərdə olan icraçı direktorlar rəsmi mərasimdən sonra mediaya açıqlamalar verərək Çində bir sıra mühüm nailiyyətlər əldə etmək istədiklərini bildiriblər. Məsələn, Tesla şirkətinin rəhbəri İlon Mask bildirib ki, burada "çox yaxşı işlərin" icrasını istəyir, Nvidia rəhbəri isə Çin rəsmiləri ilə görüşünü "mükəmməl" adlandırıb.

ABŞ-ın aparıcı texnologiya şirkətləri əsasən Çindən idxal-ixrac və istehsal baxımından asılıdırlar. Çin isə müxtəlif strateji nadir torpaq metallərinin dünya istehsalının böyük hissəsini idarə edir. Bu materiallar smartfonlardan döyüş təyyarələrinə qədər müxtəlif yüksək texnologiyalı məhsulların istehsalında əhəmiyyətlidir.