Braziliyanın Rio-de-Janeyro şəhərində helikopter qəzasında ən azı dörd nəfər həlak olub. Bu barədə ölkədə fəaliyyət göstərən Kolumbiya konsulu məlumat verib.

Şənbə günü baş verən qəza zamanı pilot və eyni ailənin üç kolumbiyalı qadını helikopterdə olub.

Məlumata görə, onlar şəhərin kənarında yerləşən, sıx meşəlik və dağlıq ərazidə olan Tijuka Milli Parkı üzərində turistik uçuş həyata keçirirdilər.

Qəzadan sonra Rio-de-Janeyro meri Eduardo Kavaliere helikopter uçuşlarına nəzarətin artırılmasının zəruri olduğunu söyləyib. O, bu məşhur turizm fəaliyyətinin təhlükəsizlik tədbirləri gücləndirilənədək "bir-iki həftə" dayandırıla biləcəyini bildirib.

“Tijuka Milli Parkında, Vista Çinesa yaxınlığında baş verən helikopter qəzasında həlak olanların ailələrinə həmrəyliyimi bildirirəm,” - Kavaliere sosial media paylaşımında deyib.

O, Braziliyanın Milli Mülki Aviasiya Agentliyi ANAK ilə əlaqədə olduğunu bildirərək əlavə edib:

“Bələdiyyə idarəsi ANAK-dan helikopter uçuşlarının artdığı şəhərimizdə nəzarəti gücləndirmək və təhlükəsizliyi təmin etmək üçün dərhal tədbir görməyi tələb edib.

Bələdiyyə idarəsinin bütün imkanlarını, zəruri tədbirlərdə ANAK-ın istifadəsinə veririk.”

Qəza, kiçik bambuk pagodasının yerləşdiyi Vista Çinesa müşahidə məntəqəsinin yaxınlığında baş verib. Tijuka Milli Parkı, Rio-de-Janeyronun məşhur İsanın Məsih heykəli və sahil şəhərinin geniş panoraması ilə tanınan əsas turizm məkanlarındandır.

Rio-de-Janeyroda fəaliyyət göstərən Kolumbiyanın baş konsulu Diana Paes AFP agentliyinə bildirib ki, şənbə günü uçuşda olan üç qadın 15 yaşlı qızın ad gününü qeyd etmək üçün şəhərə gəlmiş ailənin üzvləri olub.

Altı nəfərlik qrup helikopterdə yalnız üç nəfərlik yer olduğundan ayrı düşüb. Qızın nənəsi, əmisi arvadı və əmisi qızı qəza zamanı ölüb.

Helikopter turları şəhəri və onun abidələrini yuxarıdan görmək üçün turistlər arasında məşhurdur, lakin təhlükəsizlik məsələləri narahatlıq doğurur.

Bir müddət öncə şəhərin qərb qəsəbəsi Rekreyu dos Bandeirantesdə iki helikopterin toqquşması nəticəsində altı nəfər həyatını itirib. Hadisə iyunun 14-də baş verib.