Avropanın bir çox hissəsində növbəti şiddətli isti dalğasına hazırlaşırlar. İyun və iyul aylarında rekord temperatur meşə yanğınlarına, çayların qurumasına və minlərlə ölümə səbəb olub.

Böyük Britaniya və Fransanın bəzi bölgələrində artıq bazar ertəsi günü 30 dərəcə selsi ətrafında, yəni təxminən 90 dərəcə farenheit olan ekstremal isti xəbərdarlıqları verilib.

Britaniyanın Ətraf Mühit Agentliyinin Davamlı Biznes və İnkişaf Direktoru Toni Qreylinq bildirib: “İsti və quru hava kənd təsərrüfatına ciddi təsir edir və ətraf mühitimizdə uzunmüddətli nəticələr yaranacaq.”

Britaniya hökuməti kənd təsərrüfatında suvarma məhdudiyyətləri tətbiq edib və bəzi bölgələrdə hortumdan istifadə qadağan olunub. Ölkədə 27 milyondan çox insan su istifadəsində məhdudiyyətlər altında yaşayır. Britaniya il ərzində artıq beşinci ardıcıl isti dalğasına hazırlaşır.

Eyni zamanda Fransa hökuməti bazar ertəsi bildirib ki, ardıcıl isti dalğalar fonunda su istifadəsi ölkənin 70 faizində məhdudlaşdırılıb, quraqlıq isə pisləşir.

Məhdudiyyətlər bağların, yaşıllıq sahələrinin suvarılması, hovuzların doldurulması, avtomobillərin yuyulması və məhsulların suvarılmasına aiddir.

İspaniyanın Milli Meteorologiya Agentliyi AEMET bazar ertəsi məlumat verib ki, İspaniya 1961-ci ildən bu yana ən isti iyul ayını yaşayır. Yüksək temperatur ölkənin ən böyük meşə yanğınını alovlandırıb.

Ötən ay materik İspaniyada ən quru iyul olub. Təxminən 4,3 millimetr yağıntı düşüb ki, bu da normalın yalnız 26 faizidir.

Quraqlıq şəraiti Yunanıstan və İspaniya, o cümlədən Andalusiyada yanğınların güclənməsinə səbəb olur. Yanğınsöndürənlər alovları söndürməkdə böyük çətinliklə üzləşib.

Andalusiya fövqəladə hallar üzrə rəhbəri Antonio Sans jurnalistlərə açıqlayıb ki, orta əsr şəhəri Nieblaya yaxın ərazilərdə yanğınların söndürülməsi uzunmüddətli maneələr yarışına bənzəyir və bir neçə gün davam edəcək.

Sans əlavə edib ki, təxminən 500 nəfər həmin ərazidən təxliyə olunub.

Bundan başqa, BDB assosiasiyası adlı daxili nəqliyyat qrupunun xəbərdarlığına görə, Almaniyada Rein çayının bəzi hissələrində su səviyyəsi aşağı düşür. İsti yay temperaturu və az yağıntı səbəbindən yaxın vaxtlarda gəmiçilik mümkün olmayacaq.

Qrupun baş direktoru Yens Şvanen "Rheinische Post" qəzetinə bildirib: “Su səviyyəsi bu qədər aşağı olduqda kommersiya gəmiləri regionda malları daşıya bilməyəcək.”

“Bu o deməkdir ki, Rein çayı artıq davamlı gəminavigasiyasına əlverişli deyil və iki hissəyə bölünüb.”

Avropa planetdə ən sürətli istiləşən qitədir. İsti temperaturlar İsveçrə, Avstriya və Macarıstanda da gözlənilir.