"MapQuest" tətbiqinin gözlənilməz qayıdışı daha da gücləndi. Çərşənbə axşamı "orijinal" xəritəçəkmə tətbiqi və bir çoxlarının artıq fəaliyyət göstərmədiyini düşündüyü proqram ABŞ App Store-da ümumi sıralamada birinci yerə yüksəldi, bazar ertəsi isə səkkizinci sırada idi.

Yenilənən yüklənmələr tətbiqin Prezident Trampın icra əmri ilə "Lake Ontario" gölünün adının "Lake America" kimi dəyişdirilməsinə qarşı çıxması ilə bağlı ortaya çıxdı. ABŞ coğrafi adlar xidməti bu yeni adı qəbul etməliydi.

Avqustun 27-də verilən əmrdən sonra "MapQuest" X platformasında açıqladı ki, gölün adını dəyişdirməyəcək. Bu zaman "Google Maps" və daha sonra "Apple Maps" verilən adı qəbul etmişdi. Nəticədə "MapQuest"in ABŞ App Store-da mövqeyi tədricən yüksəldi. İstifadəçilər şirkətin mövqeyinə dəstək olmaq üçün bu tətbiqi yüklədilər.

"İnsanlar sadəcə tətbiqimizi qurmur — onlar birbaşa bizimlə əlaqə saxlayır, xüsusiyyət tələbləri verir, sosial mediada və tətbiq rəylərində səhv hesabatları göndərirlər," - "MapQuest"in direktor müavini Dağ Berger "TechCrunch"a e-poçtla açıqlama verdi. "Kiçik komandamız insanların istədiyi xüsusiyyətləri qurmaq üçün gecə-gündüz çalışır. Məqsədimiz hər kəsin tətbiqdə mükəmməl təcrübə yaşamasıdır," deyə o əlavə edib.

28 avqustdan 31 avqusta qədər tətbiqin reytinqi 128-ci yerdən 3-cü yerə qədər yüksəlib. O gün həmçinin naviqasiya kateqoriyasında 1-ci sıraya qalxdı. Bu həftənin çərşənbə axşamı isə həm tətbiqlər, həm də oyunlar üzrə ABŞ App Store-da ən yüksək sıraya çıxdı.

İcra əmri verildikdən sonra tətbiq ABŞ-da təxminən 632 min dəfə yüklənib. Bazar araşdırma firması "Sensor Tower"in məlumatına görə, "MapQuest" ABŞ və Kanadada birgə 1,5 milyondan çox quraşdırılma görüb.

"MapQuest" yeni istifadəçilərinin çoxunun sadəcə təsadüfi yükləyənlər olmadığını, onların tətbiq ilə aktiv məşğul olduğunu vurğulayıb.

İlin əvvəlindən bəri ABŞ-də "MapQuest"in yüklənmələrinin 56 faizi avqustun 27-dən sentyabrın 1-dək baş verib. Həmin dövrdə tətbiqin yüklənməsi gündəlik 123 faiz artıb və keçən ilin eyni dönəmi ilə müqayisədə 50 dəfədən çox çoxalıb.

İstifadəçilər arasında tətbiqin populyarlığı böyük texnologiya şirkətləri ilə müqayisədə fərqli mövqe tutmasının nəticəsidir. "Google" həftə əvvəl gölün adının dəyişdirilməsini rəsmiləşdirərək, rəsmi hökumət mənbələrində, o cümlədən ABŞ Coğrafi Adlar Informasiya Sistemində (GNIS) baş verən dəyişiklikləri əks etdirməyi bildirib. "Apple" şərh verməsə də, böyük ehtimalla eyni qaydalara əməl edir.

Daha kiçik oyunçu olduğundan, "MapQuest" ənənəvi qaydalardan fərqli mövqe tutmaqda daha azaddır.

Bu ilk dəfə deyil ki, şirkət belə mövqe nümayiş etdirir. Əvvəl də Meksika Körfəzini "Gulf of America" deyil, onun orijinal adı ilə çağırır. Həmçinin "MapQuest" istifadəçilərə "Lake Ontario" gölünün adını istədikləri kimi dəyişmək və nəticələri sosial mediada paylaşmaq imkanı verən əyləncəli onlayn alət təqdim edib.

Əvvəllər original xəritəçəkmə tətbiqi olsa da, "MapQuest" illər ərzində tacını "Google Maps"ə təhvil verib. İndi isə internet reklam şirkəti "System1" tərəfindən idarə olunur. Bu mülkiyyət 2019-cu ildə "Verizon"dan alınıb. "Verizon" isə 2015-ci ildə "MapQuest"in əvvəlki sahibi "AOL"u satın almışdı.