Qərbi Kanadanın uzaq bölgəsində sürətlə yayılan meşə yanğını minlərlə insanın evlərini tərk etməsinə səbəb olub. Yanğın bazar günü aşkarlandıqdan sonra iki dəfə böyüyüb.

"BC Wildfire" Xidmətinin məlumatına görə, Bald Range yanğınu artıq Britaniya Kolumbiyasının Summerland və Okanagan-Similkameen rayonlarında 36 kvadrat mildən (95 kvadrat kilometr) çox sahəni əhatə edir.

Okanagan-Similkameen Regional Rayonunun fövqəladə vəziyyət üzrə rəsmisi Erik Tompsın deyib ki, bu, yanğın meylli bölgədə gördüyü "ən sürətlə yayılan və ən böyük yanğınlardan biridir".

Yanğın şənbə günü səhərə qədər "idarəolunmaz" vəziyyətdə qalırdı.

Yanğın yaxınlaşdıqca, Summerland şəhərinin təxminən 12 min nəfər əhalisi və qonşu Peachland şəhərinin 8 minə yaxın sakini tamamilə təxliyə olunub. Şəhər rəsmiləri şənbə günü səhər Summerlandda elektrik enerjisinin də kəsildiyini bildiriblər.

Erik Tompsın cümə axşamı ilkin məlumatları fövqəladə vəziyyət əməliyyat mərkəzindən verirdi. Ancaq ertəsi səhər avtomobilindən paylaşdığı videoda o, ailəsini təxliyə etmək üçün mərkəzi tərk etdiyini açıqlayıb.

"Fövqəladə vəziyyət mərkəzini tərk edib ailəmi götürərək bu ərazidən çıxmalı oldum. İndi cənuba tərəf gedirik," deyə o bildirib.

Yanğında neçə tikilinin məhv olduğu hələ məlum deyil.

Okanagan bölgəsində çoxlu atlar olduğundan sakinlər onları təxliyə etməkdə çətinlik çəkirlər.

Heyvanlarını xilas edə bilməyənlər qapılarını açaraq ümid edirlər ki, heyvanlar özləri təhlükəsiz yer tapar. Yerli sakinlər bu barədə Kanadanın CBC telekanalına məlumat verib.

Bəzi sahiblər heyvanlarını asanlıqla tanımaq üçün üzərinə işarələr çəkiblər, CBC xəbər yayıb.