Tanzaniyanın vitse-prezidenti Emmanuel Nçimbi ölkədə 10 ay işlədikdən sonra bu həftə istefa verib. İstefa qərarından sonra o, hakim Chama Cha Mapinduzi (CMP) partiyasından intizam pozuntusu səbəbindən xaric edilib.

54 yaşlı Nçimbi son həftələrdə "Tanzaniyalıları yeni konstitusiya uğrunda mübarizə aparmağa" çağırmaq da daxil olmaqla bir neçə mübahisəli açıqlama verib. Bu açıqlamalar prezident Samia Suluhu Hassanla aralarında fikir ayrılığı olduğunu göstərir.

O, ötən ilin oktyabrında keçirilən, seçki sonrası qiyamlarda yüzlərlə insanın öldüyü mübahisəli prezident seçkisində Samianın namizəd yoldaşı olub.

Onun yerinə 43 yaşlı Energetika naziri Deoqratius Ndejembi namizəd göstərilib. Onun namizədliyi parlamentin təsdiqinə təqdim olunacaq.

Bu qərarları prezident Samianın sədrliyi ilə CMP-nin fövqəladə iclasında qəbul edib.

Partiya Nçimbiyə qarşı irəli sürülən intizam pozuntusu barədə ətraflı məlumat verməyib. Nçimbinin istefası gələn həftənin sonunda qüvvəyə minəcək.

İstefa məktubunu çərşənbə axşamı səhər Instagram hesabında paylaşan Nçimbi Tanzaniyada ilk dəfə istefa verən vitse-prezident olub.

O, ictimai həyatdan uzaqlaşacağını bildirərək "şübhəsiz ki", prezidentin dəyişiklik istədiyinə inandığını qeyd edib.

Samia və Nçimbi ötən noyabrda səsvermədə 98 faiz səs qazanaraq and içiblər.

Əsas müxalifət partiyası Chadema seçki islahatları tələb etdiyindən seçkini boykot edib.

Rəsmi araşdırmaya görə, seçki ərəfəsində baş verən zorakılıqlarda ən az 500 nəfər həyatını itirib.

Müxalifət partiyaları və insan haqları təşkilatları təhlükəsizlik qüvvələrini hökumət əleyhinə etirazlara amansız zərbə vurmaqda ittiham edir.