Hindistanda 1999-cu ildə avstraliyalı missioner Qrehem Steyns və onun iki oğlunun öldürülməsi ilə bağlı hadisədə günahlandırılan Dara Sinqin azadlığa buraxılması üçün Ali Məhkəməyə müraciət daxil olub.

Dara Sinq, əsl adı Rabindra Kumar Pal, 2000-ci ildən bəri ömürlük həbs cəzası çəkir. O, Steynsi və 6 və 10 yaşlı oğullarını Odisha bölgəsində canlı yandırmaqda suçlanır.

Qrehem Steyns 30 il loplu xəstələrlə işləyib. Lakin Sinq və onun hindu radikal qrupu missioneri kasıb hinduları və yerli tayfaları zorla xristian etməyə çalışmaqda ittiham edirdi.

Hadisə Hindistanda azlıqda olan xristian icmasının arasında şok yaratmış və dünya miqyasında etirazla qarşılanmışdı. Sinqin azadlığa çıxacağı xəbəri yenidən məsələyə diqqət çəkib.

1999-cu il yanvarın 22-də Steyns və oğulları Manoharpur kəndində keçirilən xristian iclasında iştirak etmişdilər. Gecə jeepdə yatarkən, Dara Sinqin rəhbərlik etdiyi 60-70 nəfərlik bir qrup onları əhatəyə alaraq nəqliyyat vasitəsini yandırıb və qaçmalarını əngəlləyib.

O vaxt polis Sinqin tutulmasına kömək verən məlumat üçün 800 min rupi (təxminən 18 min dollar) mükafat təyin etmişdi. Sinq bir il sonra meşədə gizlənərkən tutulub.

Həbsindən sonra Sinq Steynsin öldürülməsini inkar edib, amma missionerlərə qarşı hərəkatı idarə etdiyini etiraf edib.

2003-cü ildə məhkəmə onu ölüm cəzasına məhkum edib, iki il sonra isə Ali Məhkəmə cəzanı ömürlük həbsə çevirib.

2011-ci ildə Ali Məhkəmə Sinqin ömürlük cəzasını təsdiqləyib və ölüm hökmünün bərpasını rədd edib.

Dara Sinq başqa cinayətlərdə də təqsirləndirilir. 1999-cu ildə bir kilsəni yandırmaq, katolik keşişi Arul Dası oxla öldürmək və müsəlman ticarətçi Şeyx Rahamanı döyüb öldürməkdə günahlandırılıb və bu işlərə görə də ömürlük həbs cəzası alıb.