Google iş mühiti üçün nəzərdə tutulmuş yeni dizayn alətlər toplusu olan Google Pics-i təqdim edib. Bu vasitə, biznes istifadəçilərinə “peşəkar səviyyədə” AI şəkillərin hazırlanmasını və redaktəsini asanlaşdırmaq məqsədi daşıyır. Google Pics Gemini və Nano Banana generativ AI modelləri üzərində qurulub və istifadəçilərə istədikləri obyekt və mətnləri seçmək, həmçinin dəyişiklikləri təsvir etməklə daha detallı nəzarət imkanı verir. Bu xüsusiyyətlər chatbotların marketinq şəkillərində tez-tez yaratdığı keyfiyyətsiz nəticələrin qarşısını almağa yönəlib.

Google bildirir ki, “AI şəkil hazırlığı şəxsi istifadə üçün uğurlu olsa da, biznes aləmində vəziyyət fərqlidir. Komandalar marketinq kampaniyaları, təqdimatlar və məhsul hekayələri üçün peşəkar şəkillər yaratmaqda çətinlik çəkir. Nəticələr natamam, sınaq-səhvlər uzun sürür və çoxsaylı proqramlar arasında işləmək çətin olur.”

Google Pics həm ayrıca proqram, həm də Google Docs və Slides-ə inteqrasiya kimi təqdim olunur və yaxın həftələrdə Drive üçün də istifadəyə veriləcək. İnteqrasiyalar sayəsində istifadəçilər sənəd və təqdimatdakı şəkilləri Google Pics alətləri ilə redaktə edə biləcəklər.

Bu vasitələr istifadəçilərə sıfırdan şəkil yaratmaq, müəyyən obyektləri seçib onlara təsvir əsasında dəyişiklik etmək imkanı verir. Mətni dəyişmək, yenidən formatlaşdırmaq və tərcümə etmək də mümkündür. Google Pics 2K və 4K təsvir keyfiyyəti dəstəkləyir, şəkilləri web, sosial media və çap üçün tez kəsir və dostlar, həmkarlarla paylaşmaqla əməkdaşlıq etməyə imkan yaradır.

Canva və Adobe Express kimi yaradıcı platformalar Google Pics-in oxşar funksiyalarını təklif edir. Google, hesab edir ki, Pics vasitəsilə Workspace istifadəçiləri sadə dizayn işləri üçün üçüncü tərəf proqramlarına müraciət etməyə ehtiyac qalmayacaq.

May ayında Google I/O tədbirindən sonra testçilərə təqdim olunan Google Pics indi Business Standard, Business Plus, Enterprise Standard, Enterprise Plus, Google AI Pro, Ultra şəxsi planları və Google AI Pro Education planlarında mövcuddur.