Sərnişin daşıma şirkəti FlixBus Polşanın dənizkənarı kurortu Helə gedən 666 nömrəli avtobus marşrutunu bərpa edib.

Bu xətt əvvəllər yerli PKS Gdynia şirkəti tərəfindən idarə olunurdu və "Helə magistral" adlı mübahisəli marşrut kimi tanınırdı.

Dini mühafizəkar qruplar 666 rəqəminin Hel ilə "şeytani" əlaqəsinə qarşı etiraz göstərmiş, buna görə 2023-cü ildə xəttin nömrəsi 669-a dəyişdirilmişdi.

FlixBus-un işlədəcəyi yeni marşrut təxminən 13 saat davam edəcək və Krakovu Hel ilə birləşdirəcək. Marşrut paytaxt Varşava daxil digər böyük Polşa şəhərlərindən keçəcək.

FlixBus-un mətbuat katibi Aleksander Kalenik Polşanın TVN24 xəbər xidmətinə deyib: “666 nömrəsi qəsdən marketinq məqsədilə seçilib. Bu, məşhur tətil marşrutu olan Hel istiqamətinə olan əlaqənin görünürlüğünü artırmaq üçündür.”

2023-cü ilin iyununda PKS Gdynia şirkətinin sözçüsü mediaya bildirmişdi ki, idarə heyəti onlara ünvanlanan məktublar və xahişlərin çoxluğu qarşısında təslim olub. İllər ərzində xətt nömrəsinin dəyişdirilməsi üçün mütəmadi müraciətlər olub.

Bir polşalı dini qrup avtobus şirkətini “şeytanlığı yaymaqda” ittiham etmişdi.

İncil 666 rəqəmini “canavarın sayı” kimi təsvir edir. Hel sözü isə İngilis dilində “hell” (cəhənnəm) sözündən bir hərf fərqlidir.

Polşa əsasən Roma Katolik ölkəsi sayılır və kilsənin cəmiyyətdə böyük nüfuzu var.

Hel, Polşanın şimal sahilində, Gdańsk körfəzində yerləşən 35 kilometr uzunluğunda Hel yarımadasının ucundadır.

Turistlər Helin qumlu çimərlikləri, qədim memarlığı və dəniz aslanları sığınacağına maraq göstərirlər.