Londonda fəaliyyət göstərən Flipper Devices şirkəti Flipper Zero adlı cihazı ilə tanınır; bu cihaz hakerlər və texniki həvəskarlar tərəfindən Bluetooth, RFID, NFC və sub-1 GHz transmitser kimi müxtəlif radiosiqnal növlərinə giriş üçün istifadə olunur. Şirkət hazırda digər istiqamət götürərək məhsuldarlığa fokuslanan "Busy Bar" adlı yeni cihazını təqdim edib. Bu cihaz istifadəçilərə taymerlər təyin etmək, tətbiqləri bloklamaq və LED ekranda fərdi mesajlar və vidjetlər göstərmək imkanları verir.

Busy Bar ilk dəfə ötən il elan olunmuşdu və iyul ayında satışa çıxarılacaq. Cihaz masa saatına bənzəsə də, üzərində çoxsaylı düymələr və tənzimləyicilər yerləşir. Ön paneldə 72×16 ölçülü LED matrisi ekran var, 400 nit parlaqlığı, 16 milyon rəng dəstəyi və avtomatik parlaqlıq tənzimləyicisi mövcuddur.

Cihazın arxa tərəfində yeganə rəngli ekranda vəziyyət, taymer, batareya və əlaqə göstəriciləri əks olunur. Bu, ekran əks tərəfə dönük olarkən məlumatlara baxmaq imkanı yaradır. Həmçinin, yan tərəfində xüsusi səslər və bildirişlər üçün kiçik dinamik yerləşir.

Üst tərəfdə rejim seçicisi, start/stop düyməsi, indikator və menyularda gəzmək, vaxt təyin etmək üçün fırlanan düymə var. Cihaz Wi-Fi, Bluetooth və USB qoşulma variantlarına malikdir.

Busy Bar 3250 mAh batareya ilə təchiz olunub, aktiv iş rejimində səkkiz saata qədər, gözləmə rejimində isə iki həftəyə qədər işləyə bilir. Şirkət bildirib ki, 15Vatlıq adapter vasitəsilə cihaz bir saat ərzində tam dolur.

Cihazın əsas məqsədi istifadəçinin hansı işlə məşğul olduğunu özünə və ətrafdakılara LED ekranda göstərməkdir. Bu, xüsusilə evdən işləyənlər üçün faydalı olur, evdə digər insanların olduğu vəziyyətdə diqqəti yayındırmamaq üçün istifadə edilə bilər. Pomodoro metoduna uyğun taymerlər vasitəsilə məhsuldarlıq blokları yaratmaq mümkündür.

Flipper Devices iOS, Android və macOS üçün tətbiqlər təqdim edir, Windows tətbiqinin də yaxın vaxtlarda dəstəklənməsi planlaşdırılır. İOS və Android-də müəyyən tətbiqləri müxtəlif taymerlərlə bloklama funksiyası var. MacOS üçün mikrofon inteqrasiyası mövcuddur, bu zaman cihaz üzərində "zəngdə" statusu görünür və görüşlərə qoşulanda və ya qeyd etmə və yayımlama başladıqda bildirişlər səssizləşdirilir.

Busy Bar "Matter" sertifikatına malikdir, yəni o, Amazon, Apple və Google ekosistemləri əsasında qurulmuş mövcud ağıllı ev sistemlərinizlə işləyə bilir. Bu da istifadəçilərə cihazın vəziyyətinə görə ağıllı ev avtomatizasiyalarını aktivləşdirməyə imkan verir.

Şirkət cihazı proqramçılar üçün açıq proqram təminatı ilə hazırlayıb, onlar HTTP API, MQTT, rəsmi Python və TypeScript kitabxanaları vasitəsilə vidjetlər və mürəkkəb konfiqurasiyalar yarada bilərlər. İstifadəçilər Busy Bar-ı bulud API ilə internet üzərindən idarə edə bilərlər.

İstifadəçilər Busy Bar saytında növbəyə yazıla və ilk 3 min istifadəçi cihazı 199 dollar qiymətinə ala bilərlər. Digər istifadəçilər üçün qiymət 249 dollar təşkil edəcək. Satışlar və çatdırılma iyulun 14-də ABŞ, Aİ, Böyük Britaniya və Kanadaya başlayacaq. Şirkət həmçinin divar montajları, ekran qoruyucuları və fərdi düymələr kimi aksesuarlar təqdim etməyi planlaşdırır.