Bu il Avstriyanın paytaxtı Vyanada 70-cisi təşkil olunan "Eurovision" mahnı müsabiqəsinin ilk yarımfinalı "Wiener Stadthalle"da keçirilib. İlk yarımfinalda 10-cu sırada səhnəyə çıxan İsrailin təmsilçisi Noam Bettan tamaşaçıların narazılığı ilə qarşılaşıb. Salondakı tamaşaçılar İsrailli ifaçını etirazla salamlayıb. "Soyqırımı dayandırın!" səslərinin yüksəldiyi və bu səslərin canlı yayım zamanı də eşidildiyi müsabiqədə, bəzi tamaşaçılar Fələstin bayrağı açaraq İsrailin qurbanı olan Qəzzə xalqı ilə həmrəylik nümayiş etdirib. Üzərlərinə "Azad Fələstin" yazıları yazan, Fələstin bayraqları çəkən və "Soyqırımı dayandırın" şüarlarını səsləndirən etirazçılar zalı zorla tərk etməyə məcbur edilib. Yarımfinaldan əvvəl də Vyananın küçələrində toplaşan kütlə İsrailin müsabiqədə iştirakına etiraz edib. Vyanada geniş təhlükəsizlik tədbirləri görülüb. Moldova, İsveç, Xorvatiya, Yunanıstan, Portuqaliya, Gürcüstan, Finlandiya, Monteneqro, Estoniya, İsrail, Belçika, Litva, San Marino, Polşa, Serbiya yarımfinalın ilk hissəsində səhnəyə çıxıblar. 15 ölkənin qatıldığı ilk yarımfinalda, səsvermə nəticəsində Yunanıstan, Finlandiya, Belçika, İsveç, Moldova, İsrail, Serbiya, Xorvatiya, Litva və Polşa finala vəsiqə qazanıb. Portuqaliya, Gürcüstan, Monteneqro, Estoniya və San Marino isə müsabiqə ilə vidalaşıb. Müsabiqənin ikinci yarımfinalı mayın 14-də, final isə mayın 16-da keçiriləcək. Bu arada, İsrailin müsabiqədə iştirakına etiraz edən bəzi ölkələr yarımfinalı yayımlamayıb və əvəzində Fələstinlə bağlı verilişlər təqdim ediblər. Belçikanın paytaxtı Brüsseldə İsrailin "Eurovision" müsabiqəsinə qatılmasına etiraz olaraq "Fələstin üçün Birlik - Soyqırıma Səhnə Yoxdur" şüarı ilə alternativ konsert təşkil edilib. Sloveniyanın ictimai yayımçısı Sloveniya Radio və Televiziyası (RTV SLO) "Fələstinin Səsləri" mövzusunda Qəzzəni əhatə edən sənədli filmlər yayımlayıb. İsraili təmsil edən müğənni Bettan, "İsrailə 10 dəfə səs verin" formasında təlimatın olduğu videolar yayımlamışdı. "Eurovision" Mahnı Müsabiqəsi Direktoru Martin Qrin, 20 dəqiqə ərzində İsrailin ictimai yayım qurumu KAN-ın heyəti ilə əlaqə saxlayaraq videoların paylaşımını dərhal dayandırmağı və bütün platformalardan qaldırmağı tələb etdiklərini, qurumun da bu tələbi yerinə yetirdiyini bildirib. Qrin, "Bir sənətçiyə və ya mahnıya 10 dəfə səs verilməsi üçün birbaşa çağırış etmək qaydalarımıza və müsabiqənin ruhuna ziddir" ifadəsini istifadə edib. Martin Qrin, "KAN-a rəsmi xəbərdarlıq məktubu göndərdik və bütün təbliğat fəaliyyətlərini diqqətlə izləməyə davam edəcəyik və lazım gələrsə müvafiq tədbirlər görəcəyik" qiymətləndirməsini edib. Avropa Yayım Birliyi (EBU), Ukraynadakı müharibə səbəbindən 2022-ci ildən bəri Rusiyanı müsabiqədən kənarlaşdırdığı halda, İsrail üçün eyni qərarı qəbul etməməsi səbəbindən "ikiüzlülük" və "ikiqat standart" tənqidlərinin hədəfi olub. EBU, dekabr 2025-ci ildə keçirilən Baş Assambleya toplantısında İsrailin 2026 "Eurovision" müsabiqəsinə qatılmasını qadağan etməyib. Bu qərarın ardından bir çox Avropa ölkəsində boykot çağırışları edilib. Bunun üzərinə İspaniya, Sloveniya, İrlandiya, İslandiya və Hollandiya "Eurovision"dan geri çəkilmə qərarı alıblar. Alınan reaksiyalar nəticəsində EBU, 70-ci ildönümü çərçivəsində planlaşdırılan xüsusi "Avropa Turu"nu "gözlənilməz çətinliklər" səbəbindən ləğv etdiyini açıqlayıb. Digər tərəfdən, 2024 "Eurovision"un qalibi İsveçrəli sənətçi Nemo, İsrailin iştirakına etiraz olaraq mükafatını geri verəcəyini açıqlayıb. 1994-cü il müsabiqəsinin qalibi İrlandiyalı Charlie McGettigan da eyni yöndə qərar qəbul edib.