Comcast ən son ev marşrutlayıcılarına hərəkət aşkar edən yeni texnologiya əlavə edib. Beləliklə, ev sahibləri evlərində müşahidə olunan fəaliyyətdən xəbərdar ola bilirlər.

Pulsuz olan Wi-Fi Motion adlı funksiya yeni Xfinity marşrutlayıcılarını Wi-Fi siqnalının fasiləsini izləyərək hərəkət sensoruna çevirir. Bildirişlər Xfinity tətbiqi vasitəsilə istifadəçiyə göndərilir.

The Verge saytının məlumatına görə, Wi-Fi Motion funksiyası inkişaf etmiş Xfinity XB7 marşrutlayıcıları və daha sonrakı modellər üçün nəzərdə tutulub. İstifadəçilər Xfinity tətbiqində öz istəklərinə uyğun olaraq funksiyanı aktiv və ya deaktiv edə bilərlər. Nəşr yazıb ki, müştərilər bu funksiyanı “evdə hərəkətin aşkar edilməsi və ən azı əsas təhlükəsizlik səviyyəsinin təminatı üçün” istifadə edə bilərlər.

Bu funksiyanı aktiv edərkən məxfiliklə əlaqədar kompromis yaranır. Comcast bildirir ki, Wi-Fi Motion funksiyası zamanı yaranan məlumatları müxtəlif səbəblərlə üçüncü şəxslərlə paylaşa bilər və bunun barədə istifadəçiyə xəbər vermək məcburiyyətində deyil.

Xfinity-nin dəstək səhifəsində bildirilir: “Comcast Wi-Fi Motion tərəfindən yaradılan məlumatları hüquq-mühafizə orqanlarının istənilən araşdırması və ya prosesində, Comcast-in tərəf olduğu mübahisələrdə və ya məhkəmə qərarı əsasında əlavə xəbərdarlıq etmədən üçüncü şəxslərlə paylaşa bilər.”

Xüsusiyyəti aktivləşdirmədən əvvəl, xüsusilə məxfilik məsələlərinə həssas yanaşanlar bunun vacib olduğunu nəzərə almalıdırlar.