Cənubi Afrika prokurorları cinayət kəşfiyyatı rəisi leytenant-general Dumisani Xumalo və digər altı polis zabitinə qarşı irəli sürülmüş fırıldaqçılıq və korrupsiya ittihamlarını geri çəkib.

Onlar 2025-ci ilin iyununda kəşfiyyat bölməsində mülki şəxsin əsas vəzifəyə qanunsuz təyin olunması ilə bağlı həbs olunub, lakin ittihamları rədd edib və işdən kənarlaşdırılmayıblar.

İttihamlar ölkənin baş prokurorunun keçən ay apardığı araşdırmadan sonra paytaxt Pretoriyadakı məhkəmədə rəsmi şəkildə ləğv olunub.

Cənubi Afrika polisi uzun müddətdir siyasi müdaxilə, iddia olunan korrupsiya və yüksək kriminal səviyyələrlə mübarizədə çətinliklərlə üzləşir.

Polisdə korrupsiya iddialarının araşdırılması məqsədilə yaradılan Madlanga Komissiyası hazırda fəaliyyət göstərir. Bu qurum ötən il Prezident Siril Ramafosa tərəfindən ali polis zabitinin təşkil olunmuş cinayətkarlıq qruplarının hökumətə nüfuz etməsindən bəhs edən açıqlamasından sonra təşkil olunub.

Baş polis zabiti barəsində partlayıcı ittihamlar Cənubi Afrikada rezonans yaratdı

İttihamlarının geri çəkilməsindən sonra Pretoriyadakı məhkəmə binasının önündə Dumisani Xumalo həqiqətin üzə çıxmasından məmnun olduğunu deyib.

Prokurorlar Dineo Mokvelini cinayət kəşfiyyatındakı yüksək texniki dəstək xidmətləri vəzifəsinə uyğun olmadığını irəli sürərək, onun təyinatını “simvolik” adlandırmışdılar.

Mokvelinin vəzifəyə uyğunluğu Madlanga Komissiyasında da araşdırılıb.

Komissiyada onun vəzifəyə tam uyğunluğunu və bir neçə sertifikatının olduğunu göstərən məlumatlar təqdim olunub.

İyul ayında yüksək səviyyəli və mürəkkəb korrupsiya işlərinin araşdırılması ilə məşğul olan Milli Prokurorluğun (NPA) xüsusi bölməsinin keçmiş rəhbəri Andrea Conson komissiya qarşısında ifadə verib.

O, Mokvelinin ixtisasları barədə məlumatı olmadığını etiraf edib və onun haqqında söylədiyi sözlər üçün üzr istəyib.

Dumisani Xumalo 2022-ci ildə Cinayət Kəşfiyyatına rəhbər təyin olunub. Ondan əvvəl o, iki onillikdən çox müxtəlif polis bölmələrində çalışıb.