Avstriyalı wingsuit idmançısı Marko Valtenspild Türkiyənin Kapadokya bölgəsində isti hava şarları arasında sürətli uçuş nümayiş etdirib.

Red Bull Skydive Komandasının rəhbəri olan Valtenspild 2 800 metr yüksəklikdən isti hava şarından tullanıb.

O, müxtəlif hündürlükdə uçan şarları slalom kursuna çevirərək onların arasında təxminən 200 kilometr sürətlə hərəkət edib.

Uçuş zamanı fərqli yüksəkliklərdə külək şəraitinin dəyişməsi səbəbindən marşrutunu dəfələrlə yenidən tənzimləmək lazım gəlib. Valtenspild bildirib: “Wingsuit uçuşlarında həmişə təbiətlə birlikdə hərəkət edirsən. Lakin bu layihə zamanı hər yüksəklikdə fərqli külək şəraiti ilə qarşılaşdıq.”

O əlavə edib: “Hər dəfə şara yaxınlaşanda marşrutumu yenidən hesablamaq və saniyələr ərzində düzgün qərar vermək məcburiyyətində idim.”

Valtenspild bu uçuşu Kapadokyanın fərqli təbiəti fonunda həyata keçirməyi karyerasının ən yaddaqalan təcrübələrindən biri sayır.

Uçuş zamanı ona hava koordinatori kimi digər idmançı Marko Fürst dəstək verib.

Fürst qeyd edib: “Bu layihə yalnız sürəti deyil, həm də mükəmməl koordinasiyanı tələb edirdi.”

O vurğulayıb: “Hava şəraitinin daima dəyişməsinə uyğunlaşaraq bir-birimizi izləməliydik.”