Avstraliyanın federal məhkəməsi Coles supermarket zəncirinin gündəlik ərzaq məhsullarında saxta “Down Down” endirimləri təqdim etməsi ilə alıcıları aldattığını müəyyən edib.

Hakim Maykl O’Brayan cümə axşamı günü qərarını açıqlayaraq, bu qərarın Avstraliya supermarket sənayesi üçün əhəmiyyətli olduğunu bildirib. Coles şirkəti yüksək inflyasiya dövründə bu endirimlərin real qənaət olduğunu iddia edərək, məhkəmədə özünü müdafiə etmişdi.

Avstraliya Rəqabət və İstehlak Komissiyası (ACCC) Coles və rəqibi Woolworths-u 2021-2023-cü illər arasında alıcıları yüzlərlə məhsulun qiymətlərini promosyon kampaniyaları ilə gizlətməkdə ittiham etmişdi.

Coles işinə baxan hakim O’Brayanın qərarı may ayında final qərarının veriləcəyi oxşar Woolworths işi üzrə dinləmələrdən əvvəl verilib.

Coles supermarketində 245 məhsul orta hesabla bir il eyni qiymətə satılıb, sonra qiymətlər ortalama 28 gün qısamüddətli artıdılıb, daha sonra isə qiymət üçdə bir endirilərək əvvəldən baha və ya ona bərabər səviyyəyə gətirilib.

Bu üsul “was/is” müqayisəli qiymət strategiyası kimi tanınır. Coles “Down Down” adlı promosyon etiketi vasitəsilə, məhsulların əvvəlki daha baha qiymətlərini qısa müddətdə tətbiq etdiyi halda, onların əslində daha ucuz qiymətlərlə satıldığını açıqlamayıb.

Məhkəmədə Coles etiraf edib ki, qiyməti əvvəl yüksəldildiyi anda artıq təchizatçı ilə endirimli qiymət barədə razılıq əldə olunub.

Supermarket tərəfi baha qiymətlərin təchizatçıların topdansatış xərclərinin artımı ilə əlaqədar və inflyasiyanın yüksəlməsi fonunda gerçək endirimlər olduğunu müdafiə edib.

Məhkəmə 12 nümunə məhsulun, o cümlədən Rexona dezodorantı, Arnott’s Shapes, 2 litrlik Coca-Cola və Karicare qidalandırıcı formulunun detallı qiymətləndirilməsi və 14 promosyon etiketi üzrə dəlilləri nəzərdən keçirib.

Hakim qərarında qiymət artımlarının kommersiya şəraitində baş verdiyini və Coles-un təchizatçı tələblərinə əməl etdiyini qəbul edib.

Lakin o, ACCC-nin 13 promosyon etiketində verilən endirimlərin saxta olduğunu və qiymət artımlarının çox qısa müddətdə tətbiq olunması nəticəsində görüntünün tərsinə olduğunu təsdiqləyib.

Hakim bildirib ki, əgər orta alıcı etiketdə göstərilən əvvəlki qiymətin qısa müddətə tətbiq olunduğunu bilsəydi, bu endirimləri real saymazdı.

Məhkəmə qərarına görə, məhsulun qiyməti ən azı 12 həftə “əvvəlki” qiymət səviyyəsində olsaydı, həmin “Down Down” endirim etiketi aldadıcı sayılmayacaqdı.

Coles-un məhkəmə araşdırılan 1.2 kq ağırlığındakı Nature’s Gift it yemi məhsulunun etiketində isə əvvəlki qiymət göstərilmədiyi üçün aldadıcı olaraq qiymətləndirilməyib.

Hakim supermarketin Avstraliya istehlakçı qanununu pozduğu qənaətinə gəlib.

Bu qərara əsasən, Coles qarşıda cəzalarla üzləşəcək.