Argentina prezidenti Xavyer Milei Atlantik okeanının cənub-qərbində yerləşən Britaniya müstəmləkəsi olan Falkland adaları ilə bağlı ölkəsinin ərazi iddiasını yeniləyərək, burada işləyən neft şirkətlərinə sanksiya tətbiq ediləcəyini bildirib.

Milli müraciətində Milei "dəyişiklik küləklərinin" Arqentinanın iddiasına faydalı olduğunu qeyd edib və Vaşinqtonun bu münaqişədə neytrallığını yenidən gözdən keçirməyə hazır olduğunu vurğulayıb.

O, Britaniya və İsrail şirkətlərinin araşdırma işlərinə başlayacağı Sea Lion neft yatağını "qeyd-şərtsiz təhlükə" adlandırıb.

Ərazi üzərində 40 ildən artıqdır davam edən müharibədən sonra belə Falkland arxipelaqının suverenliyi Britaniya ilə Argentina arasında hələ də mübahisə mövzusudur.

Sea Lion neft yatağında təxminən 1,7 milyard barrel neft ehtiyatı var və istehsalın 2028-ci ildə başlaması planlaşdırılır.

Milei deyib: "Birkaç ay içində tez davranmasaq, onlar dənizimizin altında yerləşən neftə çata biləcək maddi imkanlara malik olacaqlar - bu, əvvəllər baş verməyib."

Sanksiyaların necə və nə dərəcədə tətbiq ediləcəyi hələ məlum deyil. Argentina qanunvericiliyinə görə, adalarda icazəsiz layihələrdə iştirak edən neft şirkətlərinə qarşı məhdudiyyət qoymaq mümkündür.

2013-cü ildə adaların sakinləri keçirilən referendumda 99,8 faiz səs ilə Britaniya müstəmləkəsi olaraq qalmağı dəstəkləyib.

Milei həmçinin Argentina cənubunda, Tierra del Fuego ərazisində dəniz bazasının yaradılacağını deyib və ABŞ-ın Falkland adaları məsələsində tarixi mövqeyini yenidən qiymətləndirdiyini vurğulayıb. O, ABŞ-ın Argentina üçün etibarlı tərəfdaş və dəyərli müttəfiq olduğunu əlavə edib.

Argentina qüvvələri 1982-ci ildə ərazi iddiası ilə Falkland adalarına qədəm qoyub və Britaniya hərbi qüvvələrinin müdaxiləsindən sonra 74 günlük müharibə baş verib. Münaqişədə 255 Britaniya hərbçisi, 649 Argentina hərbçisi və üç adalı həlak olub.