2026-cı il mayın 10-u. 2025-ci ilin sentyabrında İsrailin silah istehsalçısı "Elbit Systems" şirkətinin Almaniyadakı filialına hücumda ittiham olunan beş fəala qarşı məhkəmə prosesi başlayıb. İlk dinləmə aprelin 27-də Ştutqartdakı yüksək təhlükəsizlikli məhkəmədə açılıb, lakin müdafiə vəkillərinin müştəriləri ilə məxfi şəkildə əlaqə qura bilmədikləri faktına etiraz etməsindən sonra bir neçə dəqiqə ərzində dayandırılıb.

"Elbit Systems" İsrailin ən böyük silah istehsalçılarından biridir və bir neçə ölkədə törəmə zavodları var. Şirkət Almaniya Bundeshverri (Bundeswehr) daxil olmaqla, bir sıra başqa ordular üçün pilotsuz uçuş aparatları, komandanlıq-nəzarət və telekommunikasiya avadanlıqları istehsal edir. Almaniya İsrailin ikinci ən böyük silah təminatçısıdır.

Onlayn yerləşdirilən videolarda fəalların Almaniyanın cənubundakı Ulm şəhərindəki "Elbit Systems"in törəmə şirkətinin ofislərinə daxil olduğu, bir neçə kompüter və digər texniki avadanlıqlara ziyan vurduğu və divarlara "körpə qatilləri" daxil olmaqla şüarlar yazdığı görünür. Müdafiə tərəfinin bildirdiyinə görə, ərazidəki təhlükəsizlik işçiləri polisə xəbər verdikdə, fəallar hadisə yerində həbs olunmaq üçün gözləyiblər.

**Prokurorlar "Palestine Action" qrupunu "cinayətkar təşkilat" kimi şərh edirlər**

Qrup Almaniya Cinayət Məcəlləsinin cinayətkar təşkilatların yaradılmasını və onlara üzv olmasını qadağan edən 129-cu bəndinə əsasən ittiham olunur. Bu bənd son illərdə mübahisə doğurub, çünki prokurorlar onu "Last Generation" kimi iqlim qruplarına qarşı getdikcə daha çox istifadə edirlər. "Amnesty International" və digərləri bu bəndin Almaniya prokurorları tərəfindən sui-istifadə edildiyini iddia edirlər. "Bu, qanuni vətəndaş fəaliyyətini mütəşəkkil cinayətkarlıqla əlaqələndirmək riskini daşıyır" – "Amnesty International" Almaniyanın sözçüsü Paula Zimmermann DW-yə açıqlamasında bildirib.

Ştutqart dövlət prokurorları 129-cu bəndin istifadəsini qanuni hesab edərək iddia ediblər ki, müttəhimlərin aid olduğunu bildirdikləri "Palestine Action Germany" qrupu məhkəməyə qədər bir neçə məhkəmə tərəfindən "cinayətkar təşkilat" kimi qəbul edilib. DW-yə verilən açıqlamada deyilir: "Bu hüquqi şərh, bu işdə müxtəlif məhkəmələr tərəfindən bu günə qədər verilən bütün qərarlarda – ən son Ştutqart Ali Regional Məhkəməsi tərəfindən – qəbul edilib". Müdafiə tərəfi isə DW-yə prokurorların "Palestine Action Germany"nin formal bir təşkilat kimi mövcud olduğunu sübut edə bilmədiyini bildirib.

Müdafiə tərəfi, "Ulm 5" kimi tanınan qrupun Qəzzada İsrail tərəfindən həyata keçirilən soyqırımın qarşısını "özünümüdafiəyə kömək" etməklə almağa çalışdığını iddia etmək niyyətindədir. Almaniya mediası "Elbit Systems" nümayəndələrinə istinadən bildirib ki, Ulm müəssisəsi Almaniya ordusuna satılacaq telekommunikasiya hissələri üçün istifadə olunur. "Bu səhvdir," – müttəhim Leandra R.-in müdafiə vəkili Mathes Broyer (Mathes Breuer) deyib. "Bizdə Ulmdə apardıqları araşdırmaların dron istehsalı üçün vacib olduğuna dair dəlillər var. Ulmdan İsraildəki "Elbit" müəssisələrinə tanklar və dronlar üçün texniki komponentlərin göndərildiyinə dair sübutlarımız var". O, bu dəlillərin məhkəmə prosesində təqdim ediləcəyini bildirib.

**Təxirə salınmış iclaslar**

Məhkəmə Ştamhaym (Stammheim) həbsxanasındakı yüksək təhlükəsizlikli məhkəmədə, 1970-ci illərdə solçu RAF terrorçularına qarşı məşhur bir məhkəmənin keçirildiyi eyni məhkəmə zalında baş verib. Müdafiə tərəfi və Almaniya mediasındakı bəzi müşahidəçilər məhkəmə yerinin seçilməsini "Ulm 5"i terrorçu kimi təqdim etmək cəhdi kimi qiymətləndiriblər.