"Allbirds" şirkəti süni intellekt infrastrukturu üzrə fəaliyyətə başlayıb.

Şirkət istiqamətini dəyişərək çərşənbə günü ikinci dəfə adını "Smartbird Inc." olaraq dəyişib. Nadia Karlsten yeni prezident və baş icraçı direktor təyin edilib. Onun təyinatından sonra Co Vernakiyo şirkət və idarə heyətindən istefa verib.

Əvvəlki idman ayaqqabısı brendi apreldə elan etmişdi ki, intellektual mülkiyyət və ayaqqabı aktivlərini brend idarəetmə şirkəti olan "American Exchange Group"a 39 milyon dollara satacaq. Elan zamanı yeni adının "NewBird AI" olacağı bildirilmişdi, lakin sonradan bu qərarı dəyişiblər.

Rəqəmsal məhsul mühəndisliyi firması "Nagarro"nun Amerikadakı tərəfdaşı və idarəedici direktoru Stiv Hoxman şirkətin əməliyyat modelindəki dəyişikliklərin yeni biznes üçün ictimai sərmayə cəlb etməyə imkan yaratdığını söyləyib. O, bu istiqamətin uğurlu olacağını tam inanmır və bunu "gözlə və gör" hekayəsi adlandırır.

"Smartbird" çərşənbə günü bildirdi ki, çevrilə bilən maliyyələşdirmə imkanını 50 milyon dollardan 100 milyon dollara qədər artıraraq maliyyə vəziyyətini gücləndirib.

"Allbirds" bir müddətdir çətinlik yaşayırdı. Ötən ilin noyabrında şirkət üçüncü rübdə gəlirin 23,3 faiz azalaraq 33 milyon dollara düşdüyünü açıqlamışdı. Ötən il eyni dövrdə isə gəlir 43 milyon dollar olub. Yanvar ayında isə brend ABŞ-dakı bütün tam qiymətli mağazalarını bağlayacağını, ancaq iki ABŞ outlet və iki Londondakı tam qiymətli mağazanı saxlayacağını açıqladı.

"American Exchange Group"un açıqlamasına görə, onlar çərşənbə günü "Allbirds"un intellektual mülkiyyət aktivlərinin alınmasını "White Space Group" (WSG) brendi ilə tərəfdaşlıqda tamamlayıblar. WSG tərəfdaşlıqda əsas əməliyyat və inkişaf tərəfdaşı olacaq, "American Exchange" isə ayaqqabı istehsalı və dizaynını həyata keçirəcək.

"Qrup mövcud biznesi gücləndirəcək və məhsul kateqoriyalarını, pərakəndə satış distribusiyasını, lisenziyalaşdırmanı və beynəlxalq bazarlarda yeni imkanları araşdıracaq," deyə "American Exchange" bəyan edib.

Şirkətin baş icraçı direktoru Alen Mamrut bildirib: "Allbirds dünya miqyasında fərqli yanaşma ilə brend qurub və istehlakçılarla mənalı əlaqə yaradıb. Biz öz məhsul inkişafı, mənbələşdirmə və istehsal imkanlarımızı WSG-nin brend idarəsi və bazar genişləndirilməsi təcrübəsi ilə birləşdirərək, "Allbirds"u yeni kateqoriyalara, satış kanallarına və beynəlxalq bazarlara diqqətlə genişləndirməyi və brendin özünəməxsusluğunu qorumağı planlaşdırırıq."

WSG-nin təsisçisi və baş direktoru Cek Çeyka bildirib: "Biz hesab edirik ki, bu gün bazarda "Allbirds" ən cəlbedici brend fürsətlərindən biridir."

WSG vurğulayıb ki, 2024-cü ildə aldığı həyat tərzi brendi "Von Dutch" üzərində uğurla həyata keçirdiyi strategiyanı tətbiq edəcək.

Şirkət yaxın aylarda tərəfdaşlıqlar, lisenziyalaşdırma təşəbbüsləri və beynəlxalq genişlənmə planları ilə bağlı əlavə açıqlamalar verəcəyini bildirib.