Kübada enerji təchizatında vəziyyət pisləşir, Energetika naziri Visente de la O Levi dövlət televiziyasına verdiyi açıqlamada neft ehtiyatlarının tükəndiyini bildirib.

Nazir deyib ki, ölkənin enerji şəbəkəsi "kritik" vəziyyətə düşüb. "Bizdə heç bir yanacaq yoxdur, heç dizel də yoxdur... Blokada bizə ciddi zərər vurur, çünki yanacaq hələ də daxil olmur."

ABŞ dörd aydır Kubaya yanacaq idxalını bloklayır və bu, kommunist idarəçiliyindəki hökumətə təzyiq məqsədi daşıyır. 2026-cı ilin yanvarında ABŞ Prezidenti Donald Tramp Kubaya yanacaq verən ölkələrə qarşı tariflər tətbiq ediləcəyi barədə sərəncam verib.

Bunun ardından Venesuela və Meksika kimi əsas təchizatçılar Kubaya yanacaq göndərməkdən imtina edib. Dekabrdan bəri ölkəyə təkcə bir Rusiya bayraqlı neft tankerindən xam neft tədarük olunub.

De la O Levi bildirib ki, ABŞ blokadasına baxmayaraq, Kubanın yanacaq idxalı üzrə danışıqları davam edir. Lakin İran müharibəsi səbəbindən neft qiymətlərinin artması vəziyyəti çətinləşdirir.

"Kuba yanacaq satan hər kəsə açıqdır", nazir əlavə edib.

BMT ötən həftə blokadanı qanunsuz sayaraq onu Kubalılara qarşı inkişaf hüququnu pozan, həmçinin onların qida, təhsil, sağlamlıq və su təminatı kimi hüquqlarını məhdudlaşdıran bir amil kimi tənqid edib.

Blokada nəticəsində ölkənin ictimai xidmətləri iflic vəziyyətə düşüb və gündəlik həyat pozulub, bu həftə isə elektrik kəsintiləri daha da artıb.

Paytaxt Havana daxil olmaqla bir çox rayonlarda gündə 20 saata qədər enerji kəsintiləri müşahidə olunur. Cümə axşamı isə ölkənin şərq hissəsində də elektrik verilişi dayanıb. Bir neçə əyalətdə isə kəsintilər günlərlə davam edə bilər.

Çərşənbə günü Havanda etiraz aksiyaları başlayıb. Şəhərdə həmçinin qida və dərman çatışmazlığı yaşanır.

Venesuela rəhbəri Nikolad Maduro yanvar ayında tutulduqdan sonra Tramp ABŞ-ın Kubanı "ələ keçirmək" imkanlarına dair fikirlər səsləndirib. Maduro Kubaya dəstək verən əsas şəxs olub.

Kuba Prezidenti Migel Dias-Kanel çərşənbə günü ABŞ-ın "soyqırım enerji blokadası"nın ölkənin vəziyyətini ağırlaşdırdığını bildirib.

ABŞ Dövlət katibi Marko Rubio, Kubalı amerikalı və Fidel Kastronun qurduğu hökumətin kəskin tənqidçisi, Kubadakı problemlərin ordu tərəfindən idarə olunan sistemli korrupsiyadan qaynaqlandığını bildirib.

"Bu, dağılmış, işləməyən iqtisadiyyatdır və dəyişdirilməsi mümkün deyil," Rubio "Fox News"a verdiyi açıqlamada deyib. "Düşünmürəm ki, həmin rejim rəhbərlik etdiyi müddətdə Kubada vəziyyəti dəyişdirmək mümkün olacaq."