Texasda dəmiryol işçiləri Meksika sərhədinə yaxın bir terminalda yük vaqonunun içərisində altı nəfərin cəsədini aşkar ediblər. Rəsmilərin bildirdiyinə görə, hadisə bazar günü günorta saat 14:30 radələrində, temperaturun 32°C-dən yuxarı olduğu bir vaxtda baş verib. Vaqonda sağ qalan heç kim tapılmayıb.

Hadisənin səbəblərini müəyyənləşdirmək üçün araşdırmalar davam edir. Rəsmilər qeyd ediblər ki, istintaq ilkin mərhələdədir.

Bazar günü baş verən bu hadisə 2024-cü ildə Laredoda yük qatarının içində susuz vəziyyətdə xilas edilən 20 miqrantla bağlı hadisəyə bənzəyir.

“Laredo Morning Times” qəzeti 2024-cü ildə Laredonun ölkənin beynəlxalq ticarət üçün ən işlək limanı olduğunu, Meksikadan gündə orta hesabla 12 qatarın daxil olduğunu və təxminən 1500 yüklü konteyner daşıdığını yazmışdı.

ABŞ-ın ən böyük dəmiryol operatorlarından biri olan “Union Pacific” şirkəti bir çox qatarı idarə edir və bazar günü baş verən ölümlərdən sonra səlahiyyətlilərlə əməkdaşlıq etdiyini bildirib.

Şirkətin sözçüsü Daryl Bjoras (Daryl Bjoraas) verdiyi açıqlamada: “Union Pacific bu hadisədən kədərlənir və araşdırma aparmaq üçün hüquq-mühafizə orqanları ilə sıx əməkdaşlıq edir”, – deyib.

Tramp (Trump) administrasiyası Texas-Meksika sərhədində qanunsuz miqrasiyaya qarşı sərt tədbirlər görmüşdü, lakin keçidlərin sıfıra endirildiyi iddiası son günlərdə şübhə altına alınıb. “Axios” xəbər vermişdi ki, Gömrük və Sərhəd Mühafizəsinin (CBP) rəqəmlərinə görə, mart ayında sərhədi keçməyə cəhd edən 8000 nəfər saxlanılıb ki, bu da 2025-ci illə müqayisədə 15% artım deməkdir (düzəliş edildi).

Bu arada, El Pasodakı Fort Blis (Fort Bliss) hərbi bazasında, Laredodan təxminən 966 km (600 mil) aralıda yerləşən mübahisəli sərhəd immiqrasiya həbsxanasının bağlanması planlarının irəlilədiyi bildirilir. Orada İmmiqrasiya və Gömrük Nəzarəti (ICE) nəzarətində ən azı üç məhbus ölmüşdü, mart ayında isə müəssisədə qızılca epidemiyası yayılmışdı.

2022-ci ildə Meksika, Honduras, Qvatemala və El Salvadordan olan 53 miqrant, o cümlədən altı uşaq, Laredodan Texasın Forth Uort (Forth Worth) şəhərinə səfər etmək üçün nəzərdə tutulan, kondisioneri və suyu olmayan bağlı yük maşınının içində boğularaq ölü tapılmışdı.

Onları tərk edən iki kişi, Felipe Orduna-Torres və Armando Qonzales-Qarsia (Armando Gonzales-Garcia) ötən il ömürlük həbs cəzasına məhkum edilmiş, digər beş nəfər isə qaçaqmalçılıq ittihamları ilə üzləşmişdi.