ABŞ-ın İraqdakı hərbi missiyası başa çatır

Anadolu Ajansı yazır ki, ABŞ və İraq sentyabr 2024-də iki mərhələli keçid planı açıqlamışdı. Planın ilk mərhələsində İraqdakı ABŞ-ın rəhbərliyi ilə koalisiyanın hərbi missiyası başa çatacaq, ikili təhlükəsizlik əməkdaşlığına keçiləcək. İkinci mərhələdə isə Suriyada DEAŞ-a qarşı əməliyyatlara İraqdan dəstək davam edəcək.

İraq Baş nazirinin hərbi sözçüsü Sabah en-Numan bildirib ki, 30 sentyabr koalisiyanın İraqdakı missiyasının son günüdür, koalisiya qərargahı bağlanacaq, Doğal Qərarlılıq əməliyyatı başa çatacaq. ABŞ-ın son hərbçisi həmin gün ölkəni tərk edəcək və İraq tam suverenliyə qovuşacaq.

Numan əlavə edib ki, 30 sentyabrdan sonra koalisiya ölkələri ilə ikili münasibətlər davam edəcək, tərəflər bərabərlik və qarşılıqlı hörmət prinsipləri əsasında əməkdaşlıq edəcək. Koalisiya İraq qüvvələrinə hava müdafiəsi, təminat, təlim və sursat təchizatı dəstəyi göstərib. Lakin yer əməliyyatları tamamilə İraq Silahlı Qüvvələri tərəfindən aparılıb.

Təhlükəsizlik eksperti Safa əl-Assam DEAŞ-ın əsasən İraq vətəndaşlarından ibarət “yatmış hüceyrələr” kimi qalan tərkib hissələrinin kənd və rayonlardan idarə olunduğunu bildirib. İraq qüvvələrinin DEAŞ-la mübarizədə kifayət qədər gücə malik olduğunu vurğulayan Assam, hava gücü və müdafiə sahəsində isə hələ təkmilləşmə tələb olunduğunu qeyd edib. O, İrağın Fransa, Cənubi Koreya və Almaniya ilə silahlanma və texnologiya sahəsində əməkdaşlığa açıq olduğunu əlavə edib.

Siyasi analitik Hilal əl-Ubeydi fikrincə, 30 sentyabr uzunmüddətli hərbi əməliyyatların sonunu qoyaraq yeni ikili tərəfdaşlıq dövrünün başlanğıcı olacaq. Bağdat həmin tarixi ölkənin tam suverenliyinin təminatı və xarici hərbi varlığın sona çatması kimi dəyərləndirir. ABŞ isə bu tarixi hərbi missiyanı ikili təhlükəsizlik çərçivəsində yenidən təşkil etmə kimi görür.

Əl-Ubeydi əlavə edir ki, ABŞ-ın geri çəkilməsi İraqın daxili siyasətində dövlətlə bağlı olmayan silahlı qruplara qarşı addımları gücləndirə bilər. Bu, hökumətin silahları dövlət nəzarəti altına alma səylərini asanlaşdıra bilər. Eyni zamanda Bağdat Vaşinqton və Tehranın maraqları arasındakı balansı qorumaqda yeni çətinliklərlə üzləşəcək.