ABŞ Müdafiə Nazirliyi skandium mədəninin qurulması üçün Avstraliyalı şirkətə 400 milyon dollarlıq şərti kredit ayıracaq. Skandium kritik nadir torpaq elementi olmaqla, bazarın əsas hissəsi Çin tərəfindən idarə olunur.

ABŞ Prezidenti Donald Tramp ilə Vaşinqtonda mədən sektorunun rəhbərləri arasında keçirilən görüşdən sonra Pentagon bəyannamə verərək layihənin “mədənindən hazır məhsula qədər Qərbin uyğunluğunu təmin edəcəyini” açıqlayıb.

Avstraliyanın "Sunrise Energy Metals" şirkəti isə ayrı bəyannamədə Yeni Cənubi Uelsdə, Fifild ərazisində planlaşdırılan mədən sahəsinin “Qərb skandium təchizatının əsas istiqaməti” olacağını bildirib.

Şirkətin saytında “Syerston Skandium Layihəsi”nin aerokosmik və 5G/6G telekommunikasiya texnologiyaları daxil olmaqla, “kritik texnologiyalar üçün kritik metal” təmin edəcəyi vurğulanır.

Skandium müdafiə, təyyarə və məlumat mərkəzləri üçün vacib nadir torpaq elementidir və adətən digər mədənçilik proseslərinin yan məhsulu kimi əldə edilir. Bu element alüminiumu gücləndirir, elastikliyi artırır, habelə istilik və korroziyaya qarşı davamlıdır.

Yeni Cənubi Uelsdə skandiumun dünya üzrə ən yüksək konsentrasiyalarından biri mövcuddur. Çin isə təchizat və emalda üstünlük təşkil edir və ötən il müdafiə məhsullarının ixracını məhdudlaşdıraraq ABŞ-ın yeni tədarükçülərə üz tutmasına səbəb olub.

Tramp və Avstraliya Baş Naziri Antoni Albaniz isə Çinə qarşı kritik mineral razılaşması imzalayıb və hər iki ölkə layihələrə 1 milyard dollar investisiya qoymağa söz verib.

"Sunrise" şirkəti ötən il "Lockheed Martin" şirkəti ilə müqavilə bağlayaraq mədən fəaliyyətinin ilk beş ilində skandium istehsalının 25 faizini müdafiə və aerokosmik sənayenin payına ayıracaq.

Cümə günü Tramp bildirib ki, ABŞ federal hökuməti daxili istehsalı artırmaq, milli təhlükəsizliyi və sənaye siyasətini gücləndirmək üçün çoxsaylı kritik mineral və batareya layihələrinə 3 milyard dollar sərmayə qoyacaq.