Türkiyədə təhsil müddəti 2025-ci ildə 16,8 il olub

Anadolu Ajansı yazır ki, Türkiyə Statistika Qurumu 2025-ci il üçün "Gözlənilən Təhsil Müddəti" hesabatını yayıb.

Qurumun hesablamasına görə, ilkin təhsil yaşındakı bir şəxsin təhsil həyatında ən yüksək təhsil səviyyəsini tamamlayana qədər keçirdiyi müddət 16,8 il olub.

Bu dövrdə məktəbəqədər təhsil müddəti 1,6 il, orta təhsili tamamlama müddəti isə 11,9 il təşkil edib.

Ölkə üzrə ən uzun gözlənilən təhsil müddəti 18,6 il ilə Bayburt və Karabükdə, ən qısa isə 13,8 il ilə Şanlıurfada qeydə alınıb.

2025-ci ildə təhsil müddəti qadınlarda 17,2 il, kişilərdə isə 16,3 il olub, hər iki cinsdə təhsil müddətində azalma müşahidə edilib.

Qadınlarda ən uzun təhsil müddəti Tuncelidə, kişilərdə isə Bayburtda olub.

Cinsiyyət bərabərliyi indeksində qadınların üstünlüyü davam edir və 2025-ci ildə indeks 1,05-ə çatıb.

Bu göstəricidə Iğdır, Tunceli və Bartın ön sıralarda yer alıb, ən aşağı göstəricilər isə Bitlis, Şanlıurfa və Siirt ərazilərindədir.

İqtisadi Əməkdaşlıq və İnkişaf Təşkilatının (OECD) 2024-cü il məlumatlarına əsasən, Türkiyədə gözlənilən təhsil müddəti 17,2 il olub və bu, OECD ortalaması olan 16,6 ildən yüksəkdir.