Türkiyənin Energetika və Təbii Sərvətlər Nazirliyinin məlumatına görə, yaz aylarında yağıntıların güclü olması nəticəsində may ayında hidroelektrik enerji istehsalı aylıq rekord səviyyəyə yüksəlib.

Nazirlik bildirir ki, apreldə ən yüksək həddə çatmış hidroelektrik enerji istehsalı may ayında da artmaqda davam edib. Ölkədə may ayında ümumi elektrik istehsalı 27,15 milyard kilovat-saat təşkil edib.

Hidroelektrik elektrik stansiyaları mayda 11,71 milyard kilovat-saat elektrik enerjisi istehsal edərək aylıq rekord göstərici əldə edib. Bu da ölkənin ümumi elektrik istehsalının 43,1 faizini təşkil edib.

Külək enerjisi istehsalı 2,39 milyard kilovat-saat, yəni ümumi elektrik istehsalının 8,8 faizinə bərabər olub. Günəş energetikası isə 3,72 milyard kilovat-saat elektrik istehsal edərək 13,7 faiz paya sahib olub. Külək və günəş enerjisi birlikdə Türkiyənin may ayı elektrik istehsalının 22,5 faizini təşkil edib.

Daxili və bərpa olunan enerji mənbələrindən elektrik istehsalı da rekord səviyyəyə çatıb. Daxili mənbələrdən istehsal 23,07 milyard kilovat-saat təşkil edərək ümumi elektrik istehsalının 85 faizini təşkil edib. Bərpa olunan enerji mənbələrinin payı isə 72,3 faiz olmaqla 19,64 milyard kilovat-saat elektrik istehsalına çatıb.

Hidroelektrik enerji istehsalı yanvarın 1-dən mayın 31-nə kimi dövrdə 46,4 milyard kilovat-saatla həmin dövr üçün ən yüksək göstərici olub. Külək və günəş enerjisindən elektrik istehsalı da müvafiq dövrdə rekord həddə çataraq 18 milyard və 14,2 milyard kilovat-saat olmuşdur.

Ötən ilin ilk beş ayında daxili mənbələrdən elektrik istehsalı 106,5 milyard kilovat-saat, bərpa olunan enerjidən isə 88,1 milyard kilovat-saat təşkil edib. Hər iki göstərici müvafiq dövr üçün ən yüksək rekordları ifadə edir.