Türkiyənin Maliyyə naziri Mehmet Şimşek inflyasiyanın azalması prosesinin bir neçə aylıq gecikmədən sonra yenidən plan üzrə davam edəcəyini açıqlayıb.

12 iyun tarixində Türkiyə Banklar Birliyinin (TBB) 69-cu Ümumi Yığıncağında çıxış edən Şimşek hökumətin inflyasiyanı daimi olaraq tək rəqəmə endirmək üçün lazımi fiskal və struktur dəstəyi göstərəcəyini deyib. O, məqsədə çatmağın bir az uzun çəkə biləcəyini söyləyib, amma inamının qorunduğunu vurğulayıb.

"Qiymət sabitliyi bizim üçün çox önəmlidir. Bu, proqramın əsasını təşkil edir," - deyə Şimşek əlavə edib.

O, neft şokuna baxmayaraq, xarici ticarət balansında ciddi pisləşmənin olmadığını da bildirib.

"Cari hesab kəsiri çox idarə edilə biləndir. İllik hesablama əsasında xarici ticarət balansında ciddi pisləşmə yoxdur," - deyə o vurğulayıb.

Şimşek turizm kimi strategiya baxımından vacib sahələrdə də ciddi azalmanın olmadığını qeyd edib. Ümumi kənar maliyyələşmə ehtiyacının milli gəlirə nisbətinin 20 faiz səviyyəsində olduğunu, xarici şoklar baş vermədiyi halda bu rəqəmin təxminən 15 faiz olacağını da əlavə edib.

Maliyyə naziri xarici valyuta ehtiyatlarında son vaxtlar baş verən dəyişikliklərə toxunaraq, qızıl qiymətlərinin düşməsinin bu il üçün mənfi təsir yaratdığını bildirib.

"Ehtiyatlarda ümumilikdə ciddi inkişaf müşahidə olundu. Müharibədən dolayı müəyyən azalmalar baş verdi. Ehtiyatların böyük hissəsi qızılda saxlanılır və dəyişmənin təxminən 40 faizi qızıl qiymətlərinin azalması ilə bağlıdır. Ehtiyatlar barədə narahatlıq üçün əsas yoxdur," - deyə Şimşek açıqlayıb.