Taylandda şiddətli yağışlar 23 nəfərin ölümünə səbəb oldu

Anadolu Agentliyi yazır ki, Taylandda 16 sentyabrdan başlayaraq paytaxt Bangkok da daxil olmaqla 29 bölgədə güclü yağışlar müşahidə olunur və bu, sel fəlakətlərinə səbəb olub.

Tayland Fəlakətlə Mübarizə və İdarəetmə İdarəsi açıqlayıb ki, 940 min 300 evdə yaşayan 2 milyon 602 min 309 nəfər daşqınlardan təsirlənib. Hadisə nəticəsində 23 nəfər ölüb.

Xilasetmə qrupu seldən zərərçəkmiş ərazilərdə evakuasiya işlərini sürətləndirib. Daşqınlardan zərər çəkənlər üçün 233 müvəqqəti sığınacaq yaradılıb.

Rəsmi şəxslər ümumilikdə yağışların səngiməsinin gözlənildiyini bildirirlər. Lakin bəzi yerlərdə hələ də güclü yağış, ani daşqın və sürüşmə təhlükəsi qalır.

Əhali xüsusən su yollarına yaxın, dağ ətəklərində və alçaq relyefli ərazilərdə ani daşqın, daşqınlar və sürüşmə risklərinə qarşı ehtiyatlı olmağa çağırılıb.