Rusiyada mobil internetdə kəsintilər müşahidə olunur

News.ru yazır ki, sentyabrın 29-da Moskva və digər rus rayonlarında mobil internetdə ciddi fasilələr müşahidə olunub. İstifadəçilər zəif bağlantı və bəzi tətbiqlərə giriş imkanının olmamasından şikayətləniblər.

Ən çox problem Moskva və Sverdlovsk vilayətində müşahidə edilib. Bundan başqa, Yamal-Nenets Muxtar Dairəsi, Xantı-Mansi Muxtar Dairəsi, Primorsk, Perm və Krasnodar diyarları ilə yanaşı, Novosibirsk, Omsk, Samara, Kurgan və Yaroslavl regionlarında da bu narahatlıqlar qeydə alınıb.

Rusiya Prezidenti Vladimir Putin kəsintilərin əsas səbəbini terror təhlükələri ilə mübarizədə görülən tədbirlərdə görür. O bildirib ki, bu problemlər terror aktlarının qarşısını almaq məqsədilə baş verir.

Kremlin sözçüsü Dmitri Peskov bildirib ki, Ukrayna daha mürəkkəb hücum üsulları tətbiq edir və buna görə əlaqə məhdudiyyətləri təhlükəsizlik tədbirlərinin davam etdiyi müddətcə qalacaq.

Mobil internet işləmədiyi vaxtlarda rusiyalılar səsli əlaqə, SMS və xüsusi ağ siyahıya daxil edilmiş tətbiqlər vasitəsilə əlaqədə qala bilərlər. Bu siyahıda "VKontakte", "Odnoklassniki", "Mail.ru", milli messencer MAKS və "Yandex" xidmətləri var.

Həmçinin, "Megamarket", Ozon, Wildberries, Avito, Rutube, "Poçta Rossii", Alfa-Bank, VTB, RJD nəqliyyat xidmətləri, 2GIS naviqasiya servisi və digər vacib portallar da bu siyahıya daxildir.