Rumıniya hava məkanını pozan təyyarəyə reaksiya verdi

Ukrainskaya Pravda yazır ki, Rumıniya Müdafiə Nazirliyinin radar sistemi sentyabrın 27-si axşam Ukrayna ərazisindən hərəkət edən hava obyektini aşkarlayıb.

Rumıniya Hərbi Hava Qüvvələrinin iki F-16 döyüş təyyarəsi 86-cı Borça aviabazasından qalxaraq vəziyyəti nəzarətə götürüb.

Radar məlumatlarına əsasən hava obyektinin Rumıniya hava məkanına Çatalkoy bölgəsindən daxil olduğu və sərhəd boyunca hərəkət etdiyi müəyyənləşib. Təxminən 10 dəqiqə sonra obyekt Sömova yaxınlığında radar ekranlarından itkin düşüb.

Rumıniyanın Tulça bölgəsində əhalinin məlumatlandırılması üçün RO-Alert sistemi fəaliyyətə keçirilib, hava təhlükəsizliyi üzrə operativ tədbirlər görülüb. Hava təhdidi 22:05-də ləğv olunub.

Sentyabrın 28-i səhər Rumıniya Müdafiə Nazirliyinin xüsusi qrupu həmin ərazidə araşdırmalar aparmaq üçün yola düşəcək.

Xatırladaq ki, ötən gecə sentyabrın 26-da naməlum hava obyektinin Rumıniya hava məkanını pozması səbəbindən alyans təyyarələri havaya qaldırılıb.

Həmçinin, sentyabrın 26-sı Moldovanın Ştefan-Vod rayonunda Volintiri kəndinin yaxınlığında pilotsuz uçuş aparatının qalıqları aşkar olunub.

Eyni gün Rusiyanın Ukraynaya hücumları fonunda Moldovanın hava məkanına naməlum pilotsuz aparat daxil olub. O, saat 11:16-da Ukraynanın Odessa vilayətinin Stepanovka kəndi istiqamətindən gələrək Moldova sərhədini keçib və qismən tanınmayan Dnestryanı bölgədə Novokotovsk istiqamətində hərəkət edib. Obyekt saat 11:18-də Moldova hava məkanını tərk edib.