Pentaqon "Raytheon"la milyardlıq raket müqaviləsi bağlayır

Ukrainskaya Pravda yazır ki, ABŞ Müdafiə Nazirliyi "Raytheon" şirkətinin bir vahidi olan RTX ilə çoxillik, 20,7 milyard dollar dəyərində müqavilə bağlamaq üzrə ilkin razılığa gəlib. Bu müqavilə AMRAAM raketlərinin istehsalını artırmaq üçün nəzərdə tutulur.

AMRAAM raketləri hava döyüşlərində döyüş təyyarələri arasında istifadə olunur və ABŞ-ın Vaşinqton bölgəsini qorumaq üçün tətbiq edilən NASAMS hava hücumundan müdafiə sisteminin tərkib hissəsidir. Bu sistemlər həmçinin Ukrayna, Oman və Qətər kimi ondan çox ölkənin silah arsenallarındadır.

Bu müqavilə bu il Pentaqonun böyük silah tədarükü müqavilələri zəncirində ən yenisidir. Əvvəllər Lockheed Martin şirkəti ilə 58,6 milyard dollar dəyərində Patriot raketlərinin çoxillik alışı üçün müqavilə imzalanıb. Hər iki müqavilə 2032-ci maliyyə ilinə qədər davam edəcək yeddi illik plan çərçivəsindədir.

Sənaye rəhbərləri xəbərdarlıq edir ki, Konqres hələ bu çoxillik öhdəliklərin tam təminatı üçün vəsait ayırmayıb. Bu, podratçıların komponentlər və istehsal imkanlarına zəruri sərmayələri vaxtında yönəldə bilməməsinə səbəb ola bilər.

Şirkət məlumat verib ki, 2025-ci ildə AMRAAM raketlərinin istehsalını əvvəlki ilə nisbətən iki dəfə artırıb və illik həcmi 1 900 ədəddən az olmayacaq.

ABŞ öz müttəfiqlərinə böyük silah partiyaları verib və eyni zamanda İranla gedən müharibə əməliyyatlarında əvvəlki ehtiyatlardan istifadə edir. Bu, hava hücumundan müdafiə və dəqiq hədəfə yönəldilən silahların ehtiyatlarının tükənməsi ilə bağlı narahatlıqlar yaradıb.

Mətbuat ABŞ-ın bəzi əsas silah tədarüklərində təxminən beş ilə qədər gecikmələr olacağı barədə müttəfiqləri xəbərdar etdiyini yazır. Eyni zamanda, mediada ABŞ hərbi qüvvələrinin əsas hava hücumundan müdafiə sistemləri ehtiyatlarının 80 faizdən çoxunu istifadə etdiyi və ehtiyatların "təhlükəli dərəcədə aşağı" səviyyədə olduğuna dair məlumatlar yayılıb.

Pentaqon rəhbəri Pit Hekset isə mediyada ehtiyatların tükənməsi ilə bağlı yayılan xəbərləri təkzib edib.