Panama Kanalının operatoru El Niño səbəbindən az yağan yağışlar üzündən əsas su yolundan keçən gəmi sayını azaldacaq.

Panama Kanalı İdarəsi (ACP) cümə axşamı gəmiçilik şirkətlərinə bildirdi ki, 15 sentyabrdan gündə 32 gəmi keçə biləcək, hazırda isə bu rəqəm 36-dır.

El Niño dövri dəniz səthi istiləşməsi nümunəsidir və dünya üzrə hava şəraitinə təsir göstərir. Bu il hadisənin xüsusilə güclü olacağı, iqlim dəyişikliyinin isə təsirləri artırdığı gözlənir.

Gəmiçilik sahəsi artıq İrana qarşı müharibə səbəbindən strateji Hörmüz Boğazından keçən gəmi sayının azalması ilə ciddi çətinliklərlə üzləşib.

ACP-nin açıqlamasında tədbirlərin xidmətin etibarlılığını qorumaq və insan istifadəsi üçün su ehtiyatlarına qənaət etmək məqsədi daşıdığı vurğulanıb.

Qeyd olunub ki, Mərkəzi Amerikada yağış mövsümünün başlaması və kanal üzrə bəzi suya qənaət tədbirlərinə baxmayaraq, «uzunmüddətli tranzit əməliyyatlarının davamlılığını dəstəkləmək üçün» əlavə addımlar atmaq lazım gəlir.

Yeni tədbirlər 3 sentyabrdan tədricən tətbiq ediləcək.

Panama Kanalı Atlantik və Sakit okeanlar arasında gəmilərin hərəkət vaxtı və məsafəsini xeyli azaldır.

İldə təxminən 14 min gəmi bu süni su yolundan istifadə edir. Kanal 24 saat, il ərzində 365 gün fəaliyyət göstərir.

Qlobal ticarət üçün önəmli marşrut olmaqla yanaşı, Panama üçün də əsas gəlir mənbəyidir və ildə təxminən 3 milyard dollar (2,2 milyard funt sterlinq) gəlir gətirir.

2023-cü ildə ACP El Niño dövründə su yolundan istifadə edən gəmi sayını azaldıb, çünki Panama 1950-ci ildən bəri qeydə alınan ən quraq oktyabr ayını yaşayırdı.

O vaxtdan bəri idarə su istifadəsini azaltmaq üçün tədbirlər görür.

Çoxlu proqnozlar bu ilin El Niño-nun təbii hadisə kimi ən güclülərindən biri ola biləcəyini və hava şəraitinə, ərzaq təchizatına, iqtisadiyyata ciddi təsirlər göstərə biləcəyini bildirir.

Met Office: El Niño yadda qalan ən güclü olacaq

İran müharibəsində Hörmüz Boğazının niyə əhəmiyyətli olduğu

Panama kanal limanlarının idarəsini ələ keçirdikdən sonra Honq Konq "güclü etiraz" etdi