2026-cı il OpenAI üçün gözlənilən kimi keçmədi.

Şirkət illər hazırlıqdan sonra açıq səhmdar şirkətə çevrilməyə hazır idi və süni intellekt texnologiyasının inkişafı ilə bazarda lider mövqeyini qorumaq niyyətində idi.

Lakin planlar dəyişdi.

Məlumata görə, OpenAI ilkin səhm satışını azalan bazar marağı və "Anthropic" kimi rəqiblərlə artan mübarizə səbəbindən 2027-ci ilə təxirə salıb. Xüsusilə, "Anthropic"in "Claude" adlı süni intellekt köməkçisi son vaxtlar populyarlıq qazanıb.

Ən ciddi problem son aylarda şirkətdən yüksək səviyyəli rəhbərlərin ayrılması olub.

Apreldə şirkət eyni gündə üç ali rəhbərin işdən ayrılması ilə üzləşib. "Business Insider"in məlumatına görə, əvvəl baş məhsul direktorluğu etmiş Kevin Weil elmi tədqiqatlar şöbəsinin rəhbəri vəzifəsindən; Bill Peebles bağlanmış video proqramı "Sora"nın rəhbəri kimi; Srinivas Narayanan isə Business-to-Business tətbiqlərə məsul baş texnologiya rəhbəri kimi şirkəti tərk edib.

Bu həftə isə OpenAI ikinci böyük rəhbəri Fidji Simo da istefa verib.

OpenAI uzunmüddətli tibbi məzuniyyətdən sonra baş köməkçisini itirdi

"The Wall Street Journal"ın əldə etdiyi daxili məktubda Simo həmkarlarına şirkətdən ayrıldığını bildirib.

Məktuba əsasən, uzun müddət tibbi məzuniyyətdə olan Simo sağlamlıq vəziyyətinin pisləşməsi və sağalmanın gözlənildiyindən daha uzun çəkməsi səbəbindən vəzifəsini tərk edir.

Bildirilib ki, Simo 2019-cu ildən bəri Postural Ortostatik Taxikardiya Sindromu adlı xroniki nevroimmun xəstəliklə mübarizə aparır.

O, şirkətə yarımştat məsləhətçi olaraq davam edəcək, lakin CEO Sam Altman-ın köməkçisi vəzifəsindən ayrılır. Sam Altman Simo-nun sağlamlıq vəziyyətinin pisləşdiyini apreldə işçilərə bildirmişdi və həmin vaxt o, tibbi məzuniyyətə çıxmışdı.

Simo ötən ilin avqustunda şirkətə qoşulub və CEO Sam Altman-ın gündəlik işlərdən azad edilməsinə yardımçı olub. Onun öhdəsində baş maliyyə direktoru və baş gəlir direktoru, həmçinin məhsul və biznes bölmələrinin idarə edilməsi olub.

"The Wall Street Journal" yazır ki, onun apreldəki ayrılması öz vaxtında rəhbərlikdə boşluq yaradıb və investorlar, işçilər arasında şirkətin gələcəyi ilə bağlı suallar doğurub.

Simo daxili məktubda deyib: "Bu, karyeramda qəbul etdiyim ən çətin qərarlardan biri oldu, lakin bədənim mənə seçim buraxmadı — simptomlarım inadkarlığım qədər səs-küylü oldu."