Süni intellekt xərclərinin artması fonunda şirkətlər qənaət yolları axtarır. Son nümunə Microsoftdur. Şirkət OpenAI və Anthropic proqramlarından daha az istifadə edib, öz daxili modellərini tətbiq etməklə xərcləri azaltmağa başlayıb.

Microsoft ən çox istifadə olunan proqramları — Excel və Word — üçün öz MAI modellərindən istifadə edərək istifadəçi sorğularının müəyyən hissəsinə cavab verir. Bloomberg-in məlumatına görə, əvvəllər Office 365-in böyük hissəsinin OpenAI və Anthropic modelləri tərəfindən təmin olunduğu bildirilirdi.

Microsoft hələ də üçüncü tərəf modellərinə güvənir, lakin süni intellekt agentlərinin inkişafına daha çox diqqət ayırır. Ötən ay şirkət illik Build konfransında yeddi yeni MAI modelini istifadəyə verdiyini açıqladı. Bu modellər arasında agent kodlayıcı və mətndən şəkil yaradan generator var.

Texnologiya portalı TechCrunch şirkətə şərh üçün müraciət etmişdi, lakin Microsoft əlavə məlumat verməyib.

Microsoft-un bu qənaət tədbirləri texnologiya şirkətləri arasında geniş yayılmış tendensiyanın tərkib hissəsidir. İlin əvvəlində qısa müddətli "tokenmaxxing" dövründən sonra son aylarda texnologiya müəssisələrinin xərcləri azaltmaq üçün daha qənaətcil davranmaları barədə xəbərlər artıb. Amazon, Uber, Meta və Accenture kimi digər iri şirkətlər də xərcləri idarə etmək üçün addımlar atıb.

Süni intellekt xidmətlərinin təminatı və alınması xərclərinin yüksək olması sənayedə müzakirələrə səbəb olub. Silikon Vadisinin bəzi şirkətlərində xərclərin çoxluğu səbəbindən daha sərfəli həllər üçün Çin modellərinə müraciət etdikləri bildirilir. Bu, potensial təhlükəsizlik məsələlərinə baxmayaraq həyata keçirilir.