Kongo Demokratik Respublikasında prezident Felix Tişekedinin iki müddətdən artıq hakimiyyətdə qalmasına imkan verə biləcək qanun layihəsinə qarşı təşkil olunan mitinqdə rəqib siyasi qruplar toqquşub.

Cümə günü Kinşasa şəhərində parlament binası qarşısında müxalifət koalisiyası C64-nin təşkil etdiyi aksiyada hökumət tərəfdarı fəallarla toqquşma baş verib. Polis gözyaşardıcı qazdan istifadə edərək aksiyanı dağıdıb, AFP məlumat verib.

Yaralananlar arasında tanınmış müxalifət lideri Martin Fayulu da olub. Videolarda onun gözlərində və köynəyində qan olduğu, tərəfdarlarının ona yardım etdiyi görünür. Müxalifətçi Prins Epenge isə yüngül xəsarət alıb, AFP qeyd edir.

Toqquşmalar Kongo Demokratik Respublikasının bir neçə böhrandan əziyyət çəkdiyi ərəfədə baş verir. Son zamanlar Ebola epidemiyası yayılıb və uzunmüddətli münaqişə Ruanda dəstəkli M23 üsyançılarının hücumlarının artması ilə kəskinləşib.

Tişekedinin vəzifədə daha uzun müddət qalmaq cəhdləri ölkədə yeni narazılıqlar yaradıb. Onun ikinci beşillik prezidentliyi 2028-ci ildə sona çatacaq.

62 yaşlı prezident yaxınlarda bildirib ki, referendumla konstitusiyaya dəyişiklik edilərsə və xalq istəsə, üçüncü müddətə prezidentliyə razılıq verə bilər.

Kongo Demokratik Respublikasının konstitusiyası prezident müddətlərində dəyişiklik etməyə qadağa qoysa da, Milli Məclisdə müzakirədə olan qanun layihəsi, dövlət institutlarının iflic olduğu “əsas disfunksiya” halında referendumdan sonra müddət limitlərini dəyişməyə imkan verə bilər.

Ötən illərdə parçalanmış müxalifət partiyaları may ayında C64 adı altında birləşərək Tişekedinin hakimiyyətdə qalmaq planına qarşı çıxdılar.

Koalisiya təklif edilən dəyişiklikləri ölkənin stabilliyi üçün “ciddi təhdid” adlandırıb.