İranda polis yeniyetməni döyüb ələ salıb

France 24 yazır ki, sentyabrın 17-də yayılan 78 saniyəlik video görüntüsündə Təbrizin 14 nömrəli polis idarəsinin həyətində 17 yaşlı yeniyetmə döyülür və polis zabitləri tərəfindən seksual alçaldılmağa məruz qalır.

Görüntü zamanı ən azı beş polis əməkdaşı və bir mülki şəxs yeniyetməni döyür, onun şalvarını qismən aşağı salaraq təhqir edir. Videoda eşidilən dialoq azərbayanca, altyazılar isə fars dilindədir.

Polis bildirir ki, hadisə iyunun 4-də baş verib və yeniyetmə həmin vaxt küçə davaları ilə əlaqədar saxlanılıb. O, əvvəllər küçə döyüşləri, təcavüz və narkotiklə bağlı ittihamlarla üzləşib.

Hadisə ilə bağlı polis bütün əməkdaşları cəzalandırıb və müvəqqəti işdən uzaqlaşdırıb. Əlavə cəza hüquq-mühafizə orqanlarının qərarından asılı olacaq.

İranlı müstəqil jurnalist Niki Mahcub deyir ki, polis zorakılığı və seksual təhqirləri gizlətmir, bəzən bunu açıq şəkildə nümayiş etdirir. Son illərdə seksual təhqirlər artıb, lakin artımın sosial medianın daha çox məlumat yayması ilə əlaqədar olub-olmaması məlum deyil.

Mahcub bildirir ki, insan haqları təşkilatları həm siyasi, həm də adi cinayət ittihamları ilə saxlanılanlara qarşı sistemli seksual təhqirlər barədə sənədlər hazırlayıb. Lakin adi cinayətkarlarla bağlı məlumat daha azdır.